Accessibility links

чәршәмбе, 7 декабрь 2016, Казан вакыты 23:23

Prezident Räximov ulı Uralnı ğafu itteme?


Başqortstan yağulıq-energetika tarmağı tiräsendä barğan arbitraj mäxkämäse eşläre azağına yaqınlaşıp kilä kebek. Anıñ näticälären Başqortstandağı oppozitsiä citäkçeläre dä, bäysez säyäsätçelär dä «Mortaza Räximov belän anıñ ulı arasında barğan spektakl tämam» dip bäyälärgä dä ölgerde inde. «Başqortstan Däwlät Cıyılışındağı bäysez deputatlarnıñ berse Gennadiy Şabayıv äytüençä, «ğäilä äğzalarınıñ teatrı pärdäse yabıldı häm Mortaza Räximov ulı Uralnı ğafu itte». Şuşındıyraq bäyälämälär xätta köne-säğäte belän digändäy, elektron mäğlümat çaralarında da kürenä başladı.

Soñğı ike-öç ayda respublik citäkçelege Başqortstan yağulıq-energetiqä tarmağına qarağan häm Ural Räximov qulında bulğan şirkätlärne yañadan däwlät qaramağına qaytaru eşen başlağan ide. Respublik Däwlät milke ministrlığı Ural Räximov qaramağına küçkän şirkätlärne yañadan ğomum mölkätkä äyländerüne taläp itep, Arbitraj mäxkämägä möräcägät itkän ide. Mäxkämä utırışları bulıp, xätta «Başneft» belän «Başkirenerğo» şirkätläre aqsiälären däwlät qaramağına küçerü turında qarar da çığarıldı. Ämma 8 iyün könne iskitmäle yaña ber xäbär taratıldı. İmeş, Mortaza Räximov üzeneñ ulı Ural belän oçraşıp söyläşkän dä, alar mirowoy kileşügä ireşkän ikän. Närsäne añlata soñ bu? Baqsañ, Ural Räximov küpmeder milliard sum aqçanı däwlät qaramağına küçerü turında qarar itkäç, respubliknıñ Milek mönäsäbätläre ministrlığı Ural Räximov qulındağı «Başkirskiy qäpitäl» şirkätenä qarata däğwaların kire alğan ikän. Ämma qayber xäbärlärgä qarağanda, Başqortstan proquraturası eşneñ mondıy borılış aluı belän kileşmi. Läkin Başqortstanda baş proqurornıñ da prezident süzennän çığa almawın isäptä totqanda, respublik citäkçelege niçek teläsä şulay bulasın çamalap bula inde. Mortaza Räximov belän anıñ ulı arasında barğan satulaşu quyı toman artında qalamı, ällä inde ul toman tizdän taralamı, monı alar üzläre genä beläder. Şul uq waqıtta soñğı atnada respublikada tağın ber qızıqlı xäbär kiñ taraldı. İmeş, Mortaza Räximov üzenä ışanıç alu häm artaban da üz wazıyfasında qalu öçen, il prezidentı Vladimir Putinğa möräcägät itkän ikän. Räximovnıñ bu möräcäğätenä Putin äfändeneñ Başqortstanda 26 iyündä ütäçäk saylawlardan soñ ğına cawap biräçäge xaqında da söylilär. Ämma älegä bu farazlar räsmi çığanaqlardan raslanmadı. Şuña da ul farazlar imeş-mimeş sıyfatında ğına qala. Şulay da Mortaza Räximovnıñ il prezidentına irtäme-soñmı, barıber möräcägät itäçägen küplär bolay da şäyli. Başqa prezidentlar häm ğubernatorlar bu ğämälne ütägändä, Mortaza Räximovnıñ ğına añardan çittä qaluı ikele, bilgele.

XS
SM
MD
LG