Accessibility links

Başqortstan tatarları qorıltayına äzerlek qaraldı


Comğa könne Ufada Başqortstan Tatar cämägätçelek oyışmaları berlege idaräseneñ çirattağı utırışı bulıp ütte. Anıñ kön tärtibenä Başqortstan tatarları qorıltayına äzerlek barışın tikşerü mäsäläläre kertelgän ide. Elek tä xäbär itelgänçä, bu möhim qorıltay 22 iyündä Ufada ütäçäk häm anda 800 tiräse keşe qatnaşaçaq. Qorıltayğa äzerlek däräcäse xaqında täfsille çığışnı Başqortstan Tatar cämägätçelek oyışmaları berlege räise urınbasarı, professor Mäcit Xucin yasadı. Anıñ süzlärençä, älegä qorıltay ütkärü öçen räsmi xaqimiätlärgä yazılğan xatqa yazma räweştä bernindi dä cawap alınmağan. Şuña kürä dä Mäskäwgä bu turıda kisätü cibärelgän häm Başqortstan prezidentı isemenä tağın da ber xat yazılğan. Mäcit Xucin süzlärençä, räsmi citäkçelek tarafınnan bina birelmäsä dä, tatar qorıltayın ütkärü öçen bina mäsäläse tatar oyışmaları yağınnan asılda xäl itelgän inde. Ämma anıñ urını turında aldan bernindi xäbär dä taratılmayaçaq. Mäcit Xucin şulay uq Başqortstan tatarları qorıltayı aldınnan berniçä bäysez gäzit, şul isäptän Başqortstan tatarları problemnarın kiñ yaqtırtqan «Xalıq ixtıyarı» gäziteneñ dä ike sanı çığaçağın belderde. Utırışta qatnaşqan qayber milli oyışmalar wäkilläre üzläreneñ dä bu gäzitkä yazmalar äzerläwe xaqında äytte. Misal öçen, Başqortstan Tatar ictimağıy üzäge räise Ayrat Ğiniätullin üzeneñ Başqortstanda tatar mäğärife problemnarına bağışlanğan yazmalar seriäsen äzerläp basmağa tapşıruı xaqında belderde. Utırışta qorıltayğa äzerlek mäsäläläre buyınça başqa oyıştıru eşläre xaqında da centekle fiker alışu buldı.

Fänis Fätxi, Ufa
XS
SM
MD
LG