Accessibility links

дүшәмбе, 5 декабрь 2016, Казан вакыты 19:49

Groznıy-Mäskäw timer yulındağı şartlaw terror ğämäle bulırğa mömkin, di Rusiä räsmiläre



Yäkşämbe irtäsendä Mäskäwdän 150 çaqırım yıraqlıqta bulğan timer yul qazasınıñ neçkälekläre älegä tögäl bilgele tügel, Rusiä räsmiläre, ixtimal terror ğämäle turında söyli. Mäskäw ölkäse gubernator urınbasarı Aleksei Panteleev süzlärençä, Groznıydan Mäskäwgä baruçı teränneñ yulında şartlaw yañğırağan, näticäsdä ul yulınnan çıqqan. Ülem-kitemnär yuq, 40lap keşe ciñelçä cäräxätlär alğan. Rusiä Timer yulınıñ meditsina bülege başlığı Oleg Atskov:

"Bezgä 42 keşe möräcäğät itte. Törle säbäplär belän. Kübeseneñ stress näticäse, qan basımı kütärelgän. Ber malaynıñ tubıq söyäge sınğan. Ul 20nçe balalar xastaxanäsenä salındı."

Şartlaw lokomotiv aldında bulğan. Anıñ köçe 3 kilo trotil çaması dielä. FSB süzçese Diana Şemyakina süzlärençä, şartlaw bulğan urında 1 metr çaması zurlıqta çoqır qalğan. Şulay uq, relsqa bäylängän timer-çıbıqlar tabılğan. Räsmilär äytüençä, şartlatqıç çittän torıp şartlatılğanğa oşağan.

Terän Çeçen başqalasınnan çıqqan bulsa da, älegä çeçen suğışçıların ğäyepläw öçen nigez dä yuq. Çeçnägä yış säyäxät itüçe Azatlıq xäbärçese Andrei Babitski, monıñ diversiä buluında şiklänmi. Tik menä anı kem oyıştırğan, bu turıda äytüe qıyın di ul:

"Bu bik säyer närsä. Tınıç keşelär utırğan teränne yuldan çığarunıñ mäğnäsen, monıñ Basaevka, yä tağı berärsenä nigä kiräk buluın añlap betermim. İkençe yaqtan qarağanda, alay da bulırğa mömkin."

Babitski süzlärençä, ägär bu ğämälneñ maqsatı – Çeçen mäsäläsenä iğtibarnı cälep itü, yä xalıqta qurqu xisläre uyatu bulsa – ul maqsatına ireşkän diärgä bula. Qaza Rusiä başqalası yanında bulğan. Citmäsä, Rusiä könendä, prezident Vladimir Putinnıñ Kremldä däwlät büläkläre tapşıru tantanası başlanırğa berniçä säğät qalğanda.

Beryaqtan bu ğämäl yänä Çeçnädä barğan suğışnı iskä töşersä. İkençe yaqtan, Rusiäneñ teläsä qaysı urınında qurqınıç yanawına işarä itä.

Baş prokuror urınbasarı Nikolay Savçenko "terrorçılıq" häm "keşe üterü tırışlığı" digän matdälär nigezendä cinayät eşläre açılu turında iğlan itte.

Äle genä kilgän xäbärgä qarağanda, xäzer Rusiädä här ber teränne militsiä xezmätkärläre ozatıp baraçaq. Bu turıda bügen Eşke eşlär ministrınıñ berençe urınbasarı Aleksandr Çekalin xäbär itte.

-Ali Gilmi
XS
SM
MD
LG