Accessibility links

җомга, 9 декабрь 2016, Казан вакыты 06:49

Tatarstan Rusiä könen üzençä bäyräm itte


Uzğan yal könnärendä Tatarstannıñ Yäşel Üzän şähärendä häm qayber awıl-rayonnarında sabantuyları ütte. Kiläse atnağa Çallı kebek zur şähärlär ütkärergä cıyına. Uzğan atnanıñ axırında Tatarstan prezidentı Mintimer Şäymiev Kievta Ukraina prezidentı Viktor Yuşçenko belän oçraştı. Kremençuk şähärendäge Ukrtatnafta şirkäte aksiäläreneñ zur öleşe Tatarstannıqı bulsa da, bu möhim kompleks öçen tartqalaş qatı bara. Ukrainanıñ yaña xakimiäte belän Tatarstan urtaq tel tapsın öçen iñ yuğarı däräcädäge oçraşular ütkärelä. Avgust axırında BDB illäre citäkçeläreneñ sammitına Viktor Yuşçenko da kilergä mömkin dilär. Aña qädär xezmättäşlek nindi xälgä kilep citär. Kievtağı oçraşuda premyer-ministrnıñ berençe urınbasarı Rawil Moratov häm Tatneft' berläşmäse citäkçese Şäfäğät Taxautdinov qatnaştı.
Bu düşämbedä tağın eşlämäwneñ säbäbe - yäkşämbe könne ütkän serle bäyräm. 12 iyün – Rusiä köne, 1990nçe yılda Rusiä Federatsiäseneñ SSSR eçendäge suverenlılığı belän bäyle. Ä 91nçe yılda näq şul uq 12iyün könne Rusiä Federatsiäseneñ berençe prezidentı Boris Yel'sin saylanğan ide. Tatarstanda bu kön uramda yäşlärneñ maxsus oyıştırılğan aksiäläre belän bilgelände.
İñ qızığı şul - Tatarstan qızğılt-sarı yäki oranjevıy inqilabta ciñep çıqqan Ukraina prezidentı belän söyläşülär alıp bara. “Pozis” berläşmäse Ukraina öçen bik yämle äflisun tösendäge suıtqıçlar çığara, ä Rusiä töbäklärendä şuşı äflisun inqilablarına qarşı torırlıq yäşlär xäräkätläre oyıştırıla. Tatarstanda Mäskäwneñ “Naşi” – “Beznekelär” dip atalğan yäşlär xäräkäten oyıştırmıybız dip beldergän Tatarstan başlıqları şuña oxşağan “Mı” – “Bez” digän yäşlär xäräkäten ayaqqa bastırırğa bulğannar. Ul turıdan-turı “Berdäm Rossiä” yäki “Tatarstan Yaña Ğasır” xäräkäteneñ komsomolı tügel, ä ayırım oyışma bulmaqçı. Bu oyışma Surkov quşqança tawışlanırmı, ällä Tatarstan respublikası ideyälären yañğıratırmı, xäzergä açıq qına kürenmi. Şulay da berençe çığış uñışlı dip bäyälände. Döres, bu xäräkät xakimiätkä tayana häm äflisun tösendäge inqilab bulmağan Qazanda üzen ışanıçlı xis itä. Ägär dä-mägär Kievta yäki Ufada ütkän uram cıyınnarı Qazanda da bulsa, älege estrada söyüçe “Bez” oyışmasınıñ bezeldäwe tonıqlanırğa da mömkin. Tormış kürsäter.
Rimzil Wäli

XS
SM
MD
LG