Rusiä başqalasında säfärdä bulğan Britaniä premyer-ministrı Tony Blair, Zur 8lek oçraşuında Afrika burıçın kimetü häm tirä-yaq möhitne saqlaw eşläreneñ alğa kitüe öçen zur ömet bar, dip belderde. İke mäsälädä dä iñ awır söyläşülär alda äle. Zur 8lek finans ministrlarınıñ 18 yarlı ilneñ burıçların sızıp taşlarğa kileşüe – yaxşı işarä bulıp tora, dide Blair. Rusiä prezidentı Vladimir Putin belän bergä uzğan matbuğat oçraşuında Blair, Rusiä belän Britaniä arasındağı mönäsäbätlärne xupladı: "Prezident Putin inde äytep ütkänçä Britaniä häm Rusiä arasında nıqlı ike yaqlı xezmättäşlek bar. Bez kiñ qırlı xezmättäşlekneñ qayber ölkäläre turında söyläştek, ayırım alğanda tığız säwdä bäyläneşläre häm enerketika ölkäse, häm başqalar," dide Blair. Bügen Blair Mäskäwdän Germaniägä kitä, anda ul kansler Gerhard Şröder belän oçraşaçaq.
