Accessibility links

якшәмбе, 11 декабрь 2016, Казан вакыты 15:06

Tatarstanda «äflisun inqilabları»na qarşı xäräkät oyıştırıldı


«Bez»,«Mı» xäräkäteneñ, 12 jun könne bulğan, kiñ cämäğätçelekkä täqdim itü çarası, konsert mäydanında ütkärelgän säyäsi cıyılışnı xäterlätte. G.Kamal isemendäge teatr yanına mäğlüm uzışlarda qatnaşqan KamAZ maşinası quyıldı. Anıñ östendäge cäymä, Rusiä köne belän qotlawlarğa birelgän ide. Uram cıyınında iğlan itelgänçä, älege cäymä, iñ zur täbriklämä räweşendä, Mäskäwgä cibärelgän. Älege bäyräm patriotik ruxta bardı. Başta, «änä, Bulaq uramında, aq bars sını tora, ul üze telägänçä yäşi torğan, irekle haywan», dip iğtibarnı yünälttelär. «Änä, çüllärdä çapqan «KamAZ» maşinası tora. Ul, Rusiäneñ danın artırdı», digän belderälär yañğıradı. «Bezne çittän kilep öyrätmäsennär, çit illär Rusiäneñ üsüen telämilär, äflisun inqilabın Tatarstanda buldırmıybız!»,- dip notıqlar uqıldı säxnädän. Alıp baruçı yeget, iñenä pesi balasın utırtıp, «menä bu mäçe, bik molayım, ämma, kiräk çaqta tırnaqların dä kürsätä ala, digän işärälär yasadı. Kievtağı möstäqillek mäydanın da, alıp baruçılar iskä aldı. Tatarstan yäşläre, Saban tuy mäydanın ğına kürergä teli, didelär. Kamal teatrı qarşında cıyılğan xalıqqa «Fabrika-5» digän Mäskäw artistlarınıñ kilüe wäğdä itelgän ide. Alarnı kötkän arada, Qazan xalqına, Tatarstanda alıp barıla torğan yäşlär säyäsäte turında söylände. Xakimiät firqäsennän saylanğan yäş deputatlar çığıp, «inqilab yasarğa teläweçlärgä qarşı torırğa kiräk!»-, dip çaqırıp kittelär. Şul waqıtta, bäyrämgä kilgän yäşlär belän, kilü maqsatı häm närsägä qarşı toru kiräklege turında söyläşep aldıq. Ber yäş qız, «säxnädän söylängän süzlär belän kileşäm»,- dide, möselmança kiengän xatın-qız, «min tatarça söyläşmim», dip bötenläy cawap birüdän baş tarttı. Ber yeget, «nindi inqilab, belmibez, närsä söylilär, tıñlamıyıbız, «Fabrika-5»ne tıñlarğa kildek», dip añlattı. Oyıştıruçılarnıñ süzlärenä qarağanda, «Mı» «Bez» digän xäräkät monnan 2 ay elek barlıqqa kilgän. Ämma anıñ xäzer genä şulay qalqıp çığuın, küplär, Rusiä Prezidentı eşläre idäräse citäkçese Vladislav Surkovnıñ Tatarstanğa kilep kitüe belän bäylilär. Monnan ber niçä atna elek, däräcäle Rusiä çinovnigınıñ Qazanda bulıp, Tatarstan Prezidentı, qayber yäşlär oyışmaları citäkçeläre belän oçraşular uzdıruı turında xäbär çıqtı. Bezneñ mäğlümatlarğa qarağanda, ul oçraşuda, äflisun inqilablarına qarşı xäräkät oyıştıru mäs’äläse qaralğan. 12 yun kiçendä bulğan bäyrämne oyıştıruda, yäşlär eşläre ministrlığı qatnaştı. Yaña xäräkät tä kübesençä, ministrlıq belän tığız elemtädä tora torğan, studentlar oyışmalarınnan tuplandı. «Mı»,«Bez» xäräkäte räistäşe Artur Konışev xäräkäteneñ maqsatı turında bolay dip belderde :«Bez» - Rusiä däwlätenä qurqınıç tudıra, bötenlegenä yanıy torğan köçlärgä qarşı toraçaqbız. «Bez» Ukraindağı äflisun inqilabın başlap yörüçelärgä qarşı çığabız. Bezneñ uylawıbızça, çittän finanslana torğan teläsä nindi xäräkät, Rusiä iminlegenä qurqınıç tudıra.»

«Mı» xäräkäteneñ räistäşe Artur Konışev, andıy qurqınıç tudıra torğan xäräkätlär isemlegen dä iğlan itte. Berençe itep ul, «PORA» digän yäşlär oyışmasın atadı. Annan soñ, anıñ fikerençä, Limonov tarafdarları da, ideologik doşman. Mäskäwdä, şundıy uq, äflisun inqilabına qarşı oyıştırılğan «Naşi» «Beznekelär» xäräkäten dä, Tatarstandağı «Mı» dağılar fikerdäşlär, dip atıy almıy. Çönki, Tatarstanda, Mäskäwdäge kebek tügel, üzençä bulaçaq, di xäräkät wäkilläre.

Artur äfändä äytkänçä, 2 ayda xäräkät äğzäläreneñ sanı 80nnän alıp, 450 keşegä qädär artqan. Aqçanı, ere şirkätlär birä, dip añlattı «Mı» xäräkäte wäkile.

Rusiä däwlätenä patriotik xislär belän suğarılğan konsertta, ber genä tatar artistı cırladı. Mälikä. Ul da urısça ber cır başqardı. Annan tağın berne tatarça cırladı.

Mälikäne yäşlär yarattı, alqışladı, ämma, «Fabrika -5» yoldızlı törkemgä köçleräk qul çaptı häm sızğırdı. Yäşlär, «Rusiäne yaratabız», dip artistlarğa quşılıp qıçqırıp aldı. Annan, ğadi konsert başlandı.

Bu çaradan alğan tä’sirlär belän, mäydandağı ber yäş keşe büleşte. Ul, «İduşie vmeste» kebek kitaplar yırtmawına qänäğät buluın belderde, « yäşlär eşläre ministrlığında, finanslarğa qıtlıq yuq ikän, säyäsätsez genä yäşlär bäyrämnären uzdırsın ide, ämma küräsez bit ...» dide.

Bäygesez çığanaqlar isäpläwençä, Mäskäwdän artislar kitertü, mäydannı bizärlek zurlıqtağı bannerlar bastıru, oyışmanıñ tuğrasın yasatu, maxsus maykalar häm baş kiemnär bastıru, muzıkantlarnı cälep itü , tawış köçäytü, utlar uynatu häm başqa cihazlar kitertü , 1 yäki 2 million sumğa töşärgä mömkin.

Bikä Timerova.

XS
SM
MD
LG