Accessibility links

якшәмбе, 11 декабрь 2016, Казан вакыты 14:52

Tosnoda Leningrad ölkäse sabantuyı


Bıyıl Leningrad ölkäsendä tabiğät şartları hiç tä şatlandırırlıq tügel. Qoyaş bik siräk çığa, gel yañğır da , gel salqın. Sabantuy yaqınlaşqan sayın , tabiğat bäyräm itärgä birmäs mikänni , digän uy küplärne borçıy ide.

Yılğa ber märtäbä uza torğan bäyrämnän kem qorı qalırğa teläsen? Çönki sabantuy çit moxitta kön kürüçe tatar keşesenä yılına ber tapqır tanış- beleşlären kürergä, tuğan telendä söyläşep eçen buşatırğa, cır- moñnarın tıñlap läzzätlänergä, üze telägänçä cırlap- biep küñel açarğa, qısqası, ber yılğa citärlek energiä tuplarğa mömkinçelek birä torğan berdänber çara.

Xodaynıñ räxmäte, 11 iyündä, Tosno sabantuyı könne hawa şartları iskitkeç buldı, bıyıl berençe tapqır kiçkä qädär cılı, qoyaşlı kön tordı.

.Bäyräm genä , niçekter, moñsu kilep çıqtı. Ğädättä sabantuy alanına cıyıluçı xalıqnı cır- moñnarıbız qarşı ala ide, bıyıl ul da yuq, Tatarstan- Başqortstannan qunaqlar da. Anıñ qarawı, rus, belorus kiemendägelär bixisap ide. Alarnıñ konsertları da säğättän artıq bardı. Tatar- başqort sabantuyına cıyılğan keşe üzen xalıqlar duslığı festivalendä kebegräk itep xis itte.

Nihayät, beznekelärgä dä çirat citte. Säxnägä bik matur başqort milli kieme kigän Näzirä Gabbasova çıqqaç, mäydan canlanıp kitte..Tik şatlıq ozaqqa barmadı, Näziräneñ ike cırı belän xalıq öçen äzerlängän muzıykal' büläk tämam da buldı. “Aq qalfaq”, “Şatlıq” ansambl'läreneñ çığışı mömkin bulmadı- mikrofonnar eştän çıqtı. Peterburgtan kilgän “Aq qalfaq” ansambleneñ alıp baruçısı Viner Näfıykov sabantuynıñ oyıştıruçısı , Tosno tatarlarınıñ “İzge yul”cämğıäte räise İnyayatulla äfände Kutuevtan tatar sabantuyı säxnäsendä tatarlarğa urın bulmawnıñ säbäben soradı. (audio)

Uyınnar da niçekter sülpän bardı, uyınnarnı oyıştıruçılar, sud'yalar tatar uyınnarı turında işetep kenä belgängäme, qağidälären belmägängäme, tatar köräşe dä artıq qızıqsınu uyatmadı.

Mikrofonnar eşlämägäç oyıştıruçısız qalğan xalıq alay yuğalıp qalmadı, taralışırğa da aşıqmadı. Dus- işläre, tanışları belän cıyılıp tabın qorıp, uyın-kölke söyläp, cırlaşıp, taqmaqlar äyteşep utırdılar. Zur sabantuy bik kilep çıqmasa da, distälägän keçkenä sabantuylar kiçkä qädär däwam itte.

Gölzadä Kamalova, Sankt- Peterburg

XS
SM
MD
LG