Accessibility links

Кайнар хәбәр

“Raki” sıraxanäse – tatar xalqın mısqıllaw bulıp tora


Qazannıñ meñ yıllığına 75 kön, Qol Şärif mäçete açıluğa 10 kön qaldı. Bu uñaydan şähärdä törle waqiğalar bulıp tora. Şuşı könnärdä genä Qazan şähäre başlığı Qamıl İsxaqov “Rusiä xaqına” ordenı belän büläklände. Däräcäle premiäne tapşıru tantanası Sankt–Peterburgta taş utrawındağı Xökümät binasında uzdı. Älege premiä lawreatlarınıñ isemnäre “Rusiäneñ xörmät häm qäber” kitabına kertelä. 500 danä tiraj belän dönya kürgän älege kitap Rusiäneñ Säyäsät tarixı muzeena häm Rusiä töbäkläre muzeylarında saqlanaçaq. Törle yıllarda “Rusiä xaqına” premiäsenä Rusiä prezidentı Vladimir Putin, Tatarstan prezidentı Mintimer Şäymiev, Mäskäw merı Yuriy Lujkov häm başqalar iä bulğan.
Meñellıq Qazannıñ tağın ber zur waqiğası ul - Qol Şärif mäçeteneñ açıluı. Bu könnärdä tözelep yatqan unikal' mäçetneñ imamı bilgelände, älege wazıyfa Tübän Qamadağı Cämiğ mäçeteneñ imamı Ramil Yunısovqa birelde. Çığışı belän Apas rayonınnan bulğan Rämil Yunısov bügenge köndä Tatarstannıñ Diniä Näzäräte qarşındağı Ğölämälär Şurası räise, Tübän Qama rayonı qazıyı bulıp tora. Ğomumän, Qol Şärif mäçete açıluğa äzerlek tulı quät belän bara. Şuşı könnärdä genä mäçetkä Çexiädä maxsus eşlängän lyustranı elep quydılar. Eçendä qor’än futlyarları bulğan älege lyustranıñ awırlığı berniçä sentnernı täşkil itä. Möselman xatın-qızlar oyışması räise Äl'mirä Ädiätüllinanıñ Qol Şärif mäçete yanında urnaşqan “Raki” sıraxanäsen aldıru turındağı prezidentqa yullağan xatı xaqında uzğan tapşırularıbızda söylägän idek. Bügenge köndä älege xat şähär başlığı Qamıl İsxaqovta.
Möselman xatın-qızlar oyışması räise, “Möslimä” gazetı baş möxärrire Äl'mirä Ädiätüllina: Küp kenä islam illärendä bulğan Qamıl Şamil ulı İsxaqovnıñ islam qimmätlären añlawına bez ışanabız. Uraza ayında Mäskäwdä ataqay belän oçraşqanda ul “Min urazamın” dip äytkän. Şunlıqtan Qamıl İsxaqovnı imanlı keşe itep küräsebez kilä, “Raki” sıraxanäsen alıp taşlar dip ışanabız, taläp itäbez. Çönki Qol Şärif mäçete aldında urnaşqan “Raki” sıraxanäse tatar xalqın mısqıllaw bulıp tora. Tatarlar ğına tügel, ä başqa millät wäkilläre dä anı alıp taşlarğa bik teli. Bu sıraxanä eçendä restoran da bar ikän. Anda kon'yak häm başqa xäräm eçemlekläre äzerlilär. Ä keşe bik küp yörmi anda. Şunda eşläwçelär “Razoryaemsya” – dip, çañ suğalar.
Şulay itep, Qol Şärif mäçete açıluğa näq un kön qalğanda anıñ aldında urnaşqan sıraxanäneñ yabılu-yabılmaw mäs’äläse açıq qala. Respublika prezidentı kürsätmäsen Qazan başlığı ütärme-yuqmı dip cämäğätçelek tüzemsezlek belän kötä. Äle inde qısla räseme töşerelgän tarixi sıraxanä yaña tözelgän Qol Şärif mäçete aldında haman tırpayıp tora.
Al'bina Zäynulla
XS
SM
MD
LG