Accessibility links

җомга, 9 декабрь 2016, Казан вакыты 10:51

İsmäğil Şäräfiev : Tatarstan matbuğatı çit töbäklärğä çığa almyı


15 mayda, Qazanda matbuğatqa yazıluçılar köne ütte. Poçta xezmätkärläre belderüençä, yazılu kampaniäse awır barsa da, aldağılardan ällä ni ayırılmıy. Gäzitlärneñ tirajları kimüe, yäki artuı turında äle tögäl mäğlümat yuq. Näticälär, äbünä kampaniäse tämamlanğaç, 2 atnadan soñ ğına yasalaçaq.

«Tatarstan yäşläre» gäzite, zamanında iñ küp tirajlı gäzit ide. Xäzer dä anıñ 60 meñgä yaqın uquçısı bar. Yartı yıl sayın, bu häm başqa gäzitlärgä, sıyfat, uquçılarnı qızıqsındıru häm bäyä yağınnan da uquçılar aldında imtixan totarğa turı kilä. Bu sınawnı yartı yıl sayın «Tatarstan yäşläre» gäzite uñışlı uza. Närsäse belän cälep itä gäzit, nindi eş prinsipların alğı planğa quya? Bu sorawlarğa gäzitneñ baş möxärrire İsmağil Şäräfiev cawap birä. Anıñ äytüençä, gäzit uquçılarnı, ğadi keşelärne qızıqsındıra torğan waqiğalar turında yazarğa tırışa. «Tatarstan yäşläre» gäziten küplär, soñğı bittäge mäzäklär öçen bulsa da uqıy. Şuşı bülekne tuplawçı häm äzerläwçe baş möxärrir İsmağil Şäräfiev, qayber mäzäklärdä, publitsistika tiränlegendäge köçle fikerlär bula, di. Yumornıñ törlese bula, neçkä häm bik aqıllıları, tupas häm tozsızları, uquçılar da alarnı ayırırğa oyränä, di ul. Mäzäklär tormıştan alına, keşelär üzläre cibärä, iskeläre dä bügenge zamanğa yaraqlaştırılıp üzgärtelä, di İsmağil Şäräfiev. Mäzäklär tuplağan küñelle mizgellär belän bergä, baş möxärrirgä kiläse yılğa yazılu kampaniäse turında da uylarğa turı kilä. Borçu tudıra torğan yañalıqlar Poçta xezmätennän kilä. Respublikadan çittä taraluçı bu gäzitkä, yazılu bäyäläreneñ üzgärüe, yäşäeş mäs’äläsenä äylänä. İslamğil Şäräfiev : «Rusiä poçtası yazılu bäyälären 50 % artırırğa cıyına. Bu älegä imeş-mimeş, ämma bez anı tikşerdek, ul döres. Bezdän älegä bu mäğlümatnı yäşerälär. Bez ber mäs’älädä açıqlıq kertergä telädek. Gäzitneñ çit töbäklär öçen quyılğan yazılu bäyäse 150 sum, ä bezgä, Mari El respublikasınnan ber uquçı şaltırattı, anda bäyäne 500 sumğa kütärep quyğannar. Andağı poçta xezmätennän añlatmalar sorağaç, bezgä Mäskäw şulay quştı, didelär. Kem quşqanın, isemen, adresın äytmilär. Min monı Rusiäneñ milli matbuğatqa bulğan säyäsäte, dip añlıym, bälkem döres tügelder. Bälkem bu, Rusiä Poçtasınıñ säyäsäteder. Tatarstannan çitkä gäzitlärne çığaru awır. Bäyäne şulay berniçä tapqırğa kütärep, başqa suqqan kebek bula.»

«Tatarstan yäşläre »gäzite baş möxärrire İsmağil Şäräfievnıñ, poçta xezmätläreneñ bäyäse arturı turındağı xäbärne, «Tatarstan poçtası» oyışması raslamadı. Ämma inqar dä itmäde.

Bikä Timerova

XS
SM
MD
LG