Accessibility links

сишәмбе, 6 декабрь 2016, Казан вакыты 03:58

Sabantuy aldınnan


Çärşämbe könne Omskida “Tatar cırı-2005” cır bäygeseneñ berençe turı bulıp ütte. Yarış yäş buyınça ikegä bülenep, 16 yäştän 35-käçä yäşlär, häm 35 yäştän ölkänräklär arasında bardı. Näticädä 6 keşe ikençe turğa saylanıp alındı. Şuşı uq könnärdä ölkäneñ awıl-rayonnarında da “Tatar cırı “ konkursınıñ berençe turı bara. Ğädättä mart ayında ütkärelä torğan bu konkurs bıyıl maxsus sabantuy waqıtına kiçekterelgän ide. İkençe häm öçençe tur, bıyıl Ust'-İşem rayon üzägendä ütkäreläçäk ölkä sabantuyı aldınnan bulaçaq. Ä ölkä külämendä sabantuy Omski töbägendä gubernator farmanı belän, milli mädäniätlär festivale “Yedinenie” qısalarında oyıştırıla häm başqa töbäklärdän ayırma bularaq ike yılğa ber genä märtäbä ütkärelä. Yıl sayın ütkärü mömkinlege matdi yaqtan awırlıqlar belän çiklängän dip añlatıla. Bäyrämneñ töp oyıştıruçısı - Mädäniät Ministrlığı qarşında eşläwçe “Duslıq yortı”. Tatar moxtariäteneñ qatnaşı asılda sabantuy mäydanında konsert programması belän çığış yasawdan ğibärät. Bıyıl ölkädä sabantuynıñ çirattağısı. Ul iyün ayınıñ soñğı yal könnärenä bilgelängän häm äytep ütelgänçä ölkäneñ iñ yıraq – Ust'-İşem rayonında bulaçaq. Sabantuy aldınnan cır bäygesennän tış başqa çaralar ütkärü dä qaralğan. Çaralar comğa könne ük başlanıp, yäkşämbe könne sabantuy tamaşaları belän tämamlanaçaq. Bulaçaq çaralarnıñ ähämiätleräge dip “Tatar xalıq icatı – yolalar häm zamana” dip isemlängän metodik seminarnı atarğa mömkin. Anda ölkäneñ tatar awıllarında eşläwçe üzeşçän sänğät kollektivları citäkçeläreñ, kitapxanälär xezmätkärläreneñ, Qazannan kiläçäk belgeçlärneñ häm başqalarnıñ qatnaşuı kötelä. Tağı ber üzençälek - “Duslıq yortı” bıyılğı sabantuynı regionara itep ütkärergä niätli – kürşe töbäklärdän qunaqlar çaqıra. Şulay itep, Omski ölkäsendä sabantuyğa äzerlek barsa, Novosibirski ölkäsendä milli bäyrämebez inde bulıp uzdı. Uzğan yakşämbedä kürşeläreneñ bäyrämenä Omskidan “Umırzaya “ ansambeleneñ ber törkem cırçıları bardı. Novosibirski sabantuyı xaqında fikerläre belän “Umırzaya“ cırçısı Safiä Xakimova büleşä.

Yazma – Safiä

Safiä xanımnıñ Omski häm Novosibirski sabantuylarınıñ ayırması turında da üz fikerläre bar.

Yazma - Safiä

Xäbäremneñ axırında Omskida ütkän cır bäygesen iskä töşerep anda başqarılğan mönäcätne tıñlawçılar iğtibarına täqdim itäsem kilä.

Rozaliä Sayganova, Azatlıq radiosı, Omski.

XS
SM
MD
LG