Accessibility links

Кайнар хәбәр

Töbäk häm milli matbuğat bäysez bulırğa tieş


Töbäk häm milli massaküläm mäğlümat çaralarınıñ kongressı açılışında Rusiä Däwlät Duması wäkilläre, Tatarstan Prezidentı apparatı, Xökümät wäkilläre qatnaştı.

Tatarstan prezidentı apparatı citäkçese Yuri Kamaltıynov berençe bulıp respubliqa prezidentı Mintimer Şäymievneñ sälämäläwen citkerde. Qotlawda mondıy süzlär bar ide:

Töbäk häm milli massaküläm mäğlümat çaraları keşelärgä mäğlümat citkerü buyınça zur eşlär başqaralar. Häm kiläçäktä cirle üzidarälär tözüdä dä sezneñ alğa zur burıçlar yöklänä.

Rusiä töbäkläre arasında, Tatarstan, massaküläm mäğlümat çaralarınıñ küplege buyınça berençe urında tora. Häm respublikadağı 2 million yazıluçınıñ kübese berençe çiratta üz cirlegendä çığuçı basmalarğa iğtibar itä dip bilgeläp uzıldı. Xalıqnı qaydadır çittä närsä bulğanğa qarağanda, kürşe uramındağı waqiğa kübräk qızıqsındıra. Şul säbäple cirle massaküläm mäğlümat çaralarına ul kübräk möräcäğät itä.

Rusiäneñ Keşe xoquqları öçen cawaplı Vladimir Lukin cirle massaküläm mäğlümat çaralarına qarata ayırım bilgelängän säyäsät bulmawına basım yasadı. Kongressta qanun bozılu, nindi problemalar barlığı xaqında söylänsä bez bergäläp döres näticälär çığarırğa tırışaçaqbız dide. Cirle basmalar, radio-televidenie xalıq arasında abruy qazansız öçen berençe çiratta ul bäysez – obyektiv bulırğa tieşlegenä basım yasadı.

Finanslaw iñ zur problema bulıp tora. Ul ayırım qoşelekqa bäyle bulmasqa tieş.

Kongressnıñ plenar utırışında xalıqqa berençe çiratta obyektiv, döres mäğlümat kiräklege äytelde.Kemneder maqtaw, kemneder xurlaw inde berkemgä dä qızıq tügellege assızıqlandı. Rusiä Däwlät Duması Federal' Cıyınınıñ mäğlümat säyäsäte buyınça komitet räise Valeri Komissarov Massaküläm mäğlümat çaraların qurqıtırğa kiräkmi, alar belän añlaşıp eşlärgä kiräk. Tatarstanda näq şundıy säyäsät alıp barıla – anda küptörle massaküläm mäğlümat eşli dielde. Monnan tış barı millätlärne ızğıştırıp qına Rusiäne cimerep bula. Ä milli basmalar Rusiäne berläşterergä yärdäm itä digän fiker äytelde kongress açılışında.

Plenar utırış qısalarında “Köçläw häm qansızlıqqa qarşı” digän Tatarstan televidenieläre arasında Xartiä imzalandı. Televizorlan kürsätelä torğan qurqınıç fil'mnar, tapşırular turında söyläşülär küptän bara. Suğış turındağı fil'mnarnı kürsätmäw turında qanun çığarıp bulmıy dielde. Çönki mondıy qanun bulsa inde böten suğışlar xaqındağı tapşırularnı alıp atarğa kiräk bulaçaq. Ä Böyek Watan suğışı keşelärdä, balalarda ilgä mäxäbbät, keşegä miherbanlıq uyata dielde kongress barışında. Däwlät Duması wäkilläre Tatarstan televidenieläre arasındağı mondıy Xartiäne döreslegen häm xuplawların belderdelär.

Kongressta qatnaşuçılar pänceşämbe könne teploxodta Bolğarğa yul aldılar. Rusiä töbäklärennän häm BDB illärennän massaküläm mäğlümat çaraları wäkilläre comğa könne törle seksiälärdä qatnaşaçaqlar, Bolğar belän tanışaçaqlar, ä kiçen alar Tübän Qamağa kitäçäk. Şimbä könne kongressqa kilüçelär Saban tuyında qatnaşaçaqlar.

Landış Xarrasova

XS
SM
MD
LG