Accessibility links

пәнҗешәмбе, 8 декабрь 2016, Казан вакыты 12:51

Sember ölkäse iqtisadı yoqıdan uyana başladı


“Vladivostok-Avia” şirkätenä ikençe TU - 204 – 300 dip atalğan oçqıç ozatıldı inde. Avgust ayında öçençesen cibärergä äzerlänälär. Şulay uq awıl xucalığında da canlanu sizelä. Moña qädär sörem cirneñ 78 protsentı buş yata ide – kimi başladı: bıltırğığa qarağanda, 18000 gektarğa kübräk çäçelgän.

Sember ölkäsendä Böten Rusiä buyınça berençe bulıp, maynıñ 29ында yañaça oyıştırılğan munitsipal' berämleklärdä saylaw uzğanı turında xäbär itelgän ide inde. Saylaw näticäläre älegä tulayım iğlan itelmäde. Kilep ireşkän mäğlümätlär buyınça, millättäşlärebez yarıysı ğına uñışqa ireşkännär. Rayonnar Sovetları deputatları arasında tatarlar baytaq – barçasınıñ 17 protsentı çaması. Poselenielär başlıqları arasında da millättäşlärebez oçrıy.

Dimitrovgrad (Mäläkäs) şähärendä uzğan közdä genä täpiläp kitkän tatar mäktäbe üzeneñ mäktäp kenä tügel - şähär tatarlarınıñ mädäni üzäge ikänen dä isbatlap kilä. Anda borınğı milli moñıbız festivale uzdı. Mäktäp balaları da xalıq cırlarınnan çitläşmägännären kürsättelär. Ä Fäniä Xäliullova citäkçelegendäge “Sünmäs yoldızlar” ansamble solistları Raziä Bildanova belän Sabircan Mingaliev borınğı cırlarıbıznıñ çın milli ähañe belän tanıştırdılar. Ä cirle şağirebez Rawil Şäfiğullin tatar cırına bağışlanğan şiğerlären uqıdı.

“Ömet” gäzite dä soñğı sanında tulı ber säxifäsen şuşı mäktäpneñ xäl-äxvällärenä bağışlağan. Döresräk äytsäñ, anda mäktäp direktorı Mönirä Djumaevanıñ uqu yılına yomğaq kebek yazması basılğan. Ağımdağı yıl başında Mönirä xanım belän äñgämä “Azatlıq” aşa da yañğırağan ide. Älege yazma da şul uq yunäleştä. Şöker, yañalıqlar da baytaq ikän. Menä berse - “Çit mädäni möxit şartlarında milli tatar gimnaziäseneñ ternäklänüe” digän temağa seminar. Anda Tatarstannıñ Spas rayonı möğallimäläre dä qatnaşqan.

Tağın ber kürkäm xäbär. Jenevada uzğan “Xalıqara uylap tabuçılar salonı”nıñ 33-yençe kürgäzmäsendä millättäşebez Asıl Gabbasova zur uñış yaulağan. Anıñ “Virtual' şaxmat mäktäbe” digän fänni-ğamäli proyektı kürgäzmädä iñ yuğarı bäyägä layıq bulğan. Proyektnıñ üzençälege - 1, 2, 3 sıynıflar balaların şaxmatqa öyrätüdä, alarnıñ aqıl üseşen tä'min itü öçen, nänilärneñ psixologiäsenä tayanu. Asıl xanımğa, Salonnıñ kömeş medalennän tış, Vengriä delegatsiäse isemennän “Geniylar medale” dä tapşırılğan.

“Azatlıq” radiosı, Ayrat İbrahim, Sember.

XS
SM
MD
LG