Accessibility links

шимбә, 3 декабрь 2016, Казан вакыты 18:46

İranda prezident saylawları uzdı


7 namzät arasında elekke prezident Akbar Haşemi Rafsanjaninıñ ciñü ixtimalı zur dip farazlana ide. Anıñ iñ köçle köndäşläre – elekke polisiä başlığı Möhammäd Bäker Qalibaf häm elekke reformaçıl mäğärif ministrı Mostafa Moin. İran eçke eşlär ministrı Abdul-wähed Mussawi-Lari, Frans Prezz mäğlümat agentlığına, tawış birergä teläwçelär sanı yuğarı, dip belderde. İrannıñ yuğarı ruxi yulbaşçısı Ayatolla Ali Xameni, bügenge tawış birüne "igelekle ğämäl" dip bäyäläde: "Konstitusiä quşqança tawış birergä kilgänbez ikän, bez hiçşiksez konstitusiä häm sistema öçen tawış biräbez, kemne saylawıbızğa qaramastan," dide Xameni. İrannıñ atom aradaşçısı Hassan Rowhani, saylaw näticäse – İrannıñ atom säyäsätenä yoğıntı yasamayaçaq, dip belderde. Saylanaçaq prezident moña qadär inde ike möddät bu wazifada bulğan Mohammäd Xataminı alıştıraçaq. Ägär namzätlärneñ berse dä ciñü öçen kiräkle 50% tawışnı almasa, iñ küp tawış alğan ike namzät arasında saylawlar kiläse atnada ütäçäk. Bügen tawış birergä teläwçelär sanı küp buluı säbäple saylaw waqıtı ike säğatkä ozaytılğan, dip xäbär itelä. Tawış birü urınnarı cirle waqıt belän kiçke 9da yabıla. Qazanda bu waqıtta kiçke 9nçı yartı bula.

XS
SM
MD
LG