Accessibility links

пәнҗешәмбе, 8 декабрь 2016, Казан вакыты 05:09

Başqortstan tatarları qorıltayı uramda ütärme?


Ufada Başqortstan Tatar cämägätçelek oyışmaları berlege idaräseneñ çirattağı utırışı bulıp ütte. Anıñ kön tärtibenä Başqortstan tatarları qorıltayına äzerlek barışın tikşerü mäsäläläre kertelgän ide. Elek tä xäbär itelgänçä, bu möhim qorıltay 22 iyündä Ufada ütäçäk häm anda 800 tiräse keşe qatnaşaçaq dip kötelä. Ämma bu qorıltaynıñ uramda açıq hawada ütüe dä ixtimal ikän. Utırışta çığış yasağan Başqortstan Tatar cämägätçelek oyışmaları berlege räise urınbasarı, professor Mäcit Xucin süzlärençä, respublik citäkçeläre Başqortstan tatarları qorıltayı öçen bina birdertmäw öçen barlıq çaralarnı da kürä. Mäcit äfände äytüençä, Başqortstan prezidentı xaqimiätenä bina sorap cibärelgän ike xatqa da räsmi töstä bernindi dä cawap alınmağan. Barı tik teldän genä bu qorıltay öçen bina birelmäyääçge xaqında iskärtelgän. Alay ğına da tügel, Mäcit Xucin süzlärençä, Ufadağı barlıq mädäniät sarayları direktorları tatar qorıltayın ütkärü öçen bina birmäskä dip qatğıy kürsätmä alğan. Şunnan soñ tatar milli oyışmaları, bina sorap, Ufa şähäre xaqimiäte başlığı Pawel Qaçqayıvqa da möräcägät itkän. Alar qala xaqimiäte qaramağındağı Şähär mädäniät sarayınıñ zur zalın sorap xat yazğan bulğan. «Ämma bu xatqa da bez tiskäre cawap aldıq, – di Mäcit Xucin. – Qaçqayıvnıñ urınbasarı Midxät Mämbätov qul quyğan cawap xatında Ufa Şähär mädäniät sarayında iyün ayında tözekländerü eşläre baruı säbäple anı arendağa birü mömkin tügellege xaqında äytelgän. Bez monı tikşerü öçen maxsus Mädäniät sarayına barıp, direktor Larionov äfände belän söyläştek. Ämma ul anda bernindi dä tözekländerü eşläre barmawın äytte. Mämbätov iptäş rizalığı bulsa, ul xätta 22 iyündä tatar qorıltayın ütkärergä bina birügä dä qarşı tügel. Ämma qala xaqimiäte üzeneñ aldaqçılığın beldertmäskä tırışaçaq häm, älbättä inde, binanı birmäyäçäk». Mäcit Xucin şuşı xäldä Başqortstan tatarları qorıltayın ütkärüneñ ikençe yulın saylawdan başqa çara qalmawı xaqında äytep, menä nilär belderde. Şulay itep Ufada Başqortstan tatarları qorıltayın ütkärü bu yulı da şik astında. Mäğlüm buluınça, bıltır noyäbr ayına bilgelängän qorıltay öçen dä Başqortstan räsmi xaqimiätlärennän bina ala almağaç, ul cıyınnı Mäskäwgä barıp uzdırırğa mäcbür bulğannar ide. Bu yulı qorıltay uramda uzaçaq kebek kürenä häm anıñ kübräk Başqortstan citäkçelegenä qarşılıq çarasına oxşayaçağı şäylänä.

XS
SM
MD
LG