Ul aynıñ soñğı yal könnärendä, saylawlar arqasında, bäyrämnär tuqtalıp tordılar – qalğan sala-qalalarda iyündä uzdılar. Soñğısı – ölkä üzägeneke iyünneñ 18ендә buldı.
Bıyılğı bäyrämnärneñ berençe üzençälege – tatar awılları bulmağan Weşqayma, Radişçev, Novospasski rayonnarı üzäklärendä milli bäyrämebezneñ oyıştırıluı.
İske Qulatqı häm Çardaqlı rayonnarında öçär awılda häm rayon üzäklärendä, ä Qarsun rayonınñ 4 awılında buldı Sabantuy. Tatar bik az yäşägän Sura, Bazarlı Sızğan häm Kuzovat rayonnarında andıy bäyräm oyıştırılğanı yuq älegä.
Ölkä üzäge Sabantuyında soñğı yıllarda gubernatornıñ qatnaşuı ğadäti xälgä äylängän ide. Bu yulı Sergey Morozov waqıt tapmağan bulıp çıqtı. Anıñ qarawı Tatarstannan citdi delegatsiä kilgän ide. Däwlät Şurası särkätibe Valentina Lipujina İlbaşı Şäymiewneñ täbrik süzen xalıqqa citkerde. İñ zur räsmi qunaq sıyfatında çığış yasağan şähär merı Sergey Yermakov mäktäp açu, Tatar mädäni üzägenä bina birü turındağı elekke ütälmägän wäğdälären qabatladı. Çaralar ezlibez, dide. Ä Çistay rayonı başlığı Vyaçeslav Kozlov aña çapan belän töbätäy kidergäç, “yä – nastoyaşçiy tatarin”, dide. Yuğisä, Yırmaq - Yärmäk süzeneñ tatarça yañğırağanı bolay da mäğlüm inde anısı.
Çistaylar ikençe yıl inde Sember sabantuyın bizilär. Näq Çistay yegete üzäk säxnädäge tamaşanı tal''yan moñı belän başlap cibärde. Annan soñ alar Yäşlär säxnäse dip yörtelgän ikençe urında zur tamaşa birdelär. Konsertlar ike mäydanda da kön buyı, diärlek, bardılar. Çönki üz säläten kürsätergä telägän härkemgä mömkinlek birelde.
Sabantuy çaraları küptörle äzerlängän: 12 urında törle şayan uyınnar, bäygelär oyıştırılğan ide. Ämma iğtibar üzägendä, älbättä inde, milli köräş buldı.
Köräş mäydanında kürkäm yañalıq. Elek köräş alanı arqan belän uratıp alınğan çiräm genä ide. Bıyıl isä “Sember” isemle tatar maltabarları berlege äğzaları Färit Äyupov belän Nazıym Minebaev menä digän büläk äzerlägännär. Köräşçelär 70 santimetr bieklektäge platformada bil alıştılar. Ä xalıq törle bieklektäge eskämiälär rätlärendä räxätlänep utırıp qaradı köräşne. Qazıylarğa da uñay şart: alar öçen maxsus yasalğan bülmä biektä – subaylar östendä yasalğan: mäydan uç töbendä kebek kürenä.
Bäygedä Qazan, Bua, Çistay, Çuaşstan köräşçeläre dä qatnaştılar. Bigräk tä Çuaşstannıñ Şığırdan awılı iseme yış yañğıradı. Alar üzläreneñ berdämlegen, üzara yärdämçellegen, batırlarnı därtländerä belülären kürsättelär
Törle awırlıqlarda büläkle urınnar yallawçılar arasında da – alar baytaq. Ä menä Sember ölkäse köräşçeläre - barı tik ölkä üzäge häm Dimitrovgrad (Mäläkäs) şähärennän genä. Andağı sport klublarında şöğellänüçelär.
Absolyut batır isemen Mäläkäs yegete Sergey Pawlik yawladı. Dimäk, täkä dä, gubernator isemennän oluğ büläk tä aña tapşırıldı.
Ayrat İbrahim, Sember
