Accessibility links

якшәмбе, 4 декабрь 2016, Казан вакыты 17:22

Mäskäw ölkäsendä Sabantuyı


Bıyıl Mäskäw ölkäse Saban tuyın Balaşixa şähärendä ütkärde. Uzğan yıl ul Şelekovada ütkän ide. Ä inde ikençe yılğa Odinsovada ütärgä tieş ikän. Bu xaqta Saban tuyı qunaqların qabul itkän Balaşixa şähäre başlığı urınbasarı Aleksey Dedkov xäbär itte. Saban tuyı aldınnan bulğan Balaşixanıñ xakimiät binasındağı ul oçraşuda Tatarstannıñ wäkälätle wäkile Nazif Mirixanov , Tatarstannıñ Mäskäw ölkäsendäge räsmi Saban tuy qunaqları Tatarstannıñ Quqmara rayonı xakimiät başlığı Rawl Raxmatullin , Tatarstannıñ xalıq şağire Rawil Fayzullin , şulay uq kiläse yılğa Saban tuyı bulaçaq Odinsova rayonınıñ xakimiät başlığı da uzğan yıl Saban tuyı ütkän Şçelkovo rayonı başlığı da bar ide. Mäskäw ölkäsendä Saban tuyları estafeta kebek här yılnı rayonan rayonğa küçep yöri. Şul uq waqıtta gel tatarlar ğına yäşägän qayber awıllar Mäskäw ölkäsendä üz Saban tuyların da ütkärälär. Şundıy Saban tuyı Zvyagino awılında da ütkän häm Domodedova rayonında da ütärgä tieş.Mäskäw ölkäse Saban tuyların oyıştırunı başlap yörüçelär älbättä milli mädäni möxtäriät, anıñ räis urınbasarı Färit Mogtasarov. Bıyıl Mäskäw ölkäse zur Saban tuyı da bik oyışqan räweştä küñelle ütte dip äytergä bula. Şunısı qızıqlı,Saban tuyı qunaqlarına büläk itep birelgän Balaşixa şähäre turında yazılğan kitapta, bu şähär tatar keşesennän başlanğan. Äle Ultın Urda waqıtlarında uq Balaş isemle säwdägär bu yaqlarda üz eşe belän dan totqan dip yazılğan. Şuña kürä dä Saban tuynı milli kiemle, caydaq Balaş üze açıp cibärde.Saban tuynı alıp baruçı Balaşixa isemendä dürt tatar süze bar “bal”, “bala”,”aş” “baleş” - tağın nindi tatar süzläre kergän bu isemgä dip, bäyge dä iğlan itte. (audio)

Bäyrämne açarğa säxnägä räsmi qunaqlar kütärelde. Tatarstannıñ Quqmara rayonı başlığı säxnädäge qunaqlarğa Tatarstan isemennän qızıl başlı sölgelär tapşırıp, başlarına tübätäylär kiderde häm Tatarstan prezidentı isemennän ike teldä qotlaw xatın da citkerde. (audio) Köräşçelärgä digän täkäne dä , xalıqqa digän konsert programmasın da alıp kilgän ide quqmaralılar. Mäydanda xalıq öçen küp törle kibetlär dä aşxanälär dä eşläp tordı. Tik şunısın da äytergä kiräk ber genä säwdä noqtasında da isertkeç eçemlek xättä sıra kebek eçemleklär dä satılmadı. Bäyräm aşı waqıtında qotlaw süze, yägni tost äytüçe qunaqlar isertkeçlärdän başqa da yaxşı süzlär äytep bula ikän dip, şayarttılar.

Saban tuyına kilgän xalıqnı Tatarstannıñ wäkälätle wäkile Nazif Mirixanov ta, Mäskäw milli mädäni möxtäriäte räise Räsim Aqçurin, köräşçelär başlığı Rif Gaynanov häm başqalar da säxnädän qotladı.Şağir Rawil Fayzullin qotlaw süzläre citkergännän soñ şiğeren dä uqıdı. (audio)

Mäskäw ölkäseneñ Zvyagino awılında anı tulısı belän tatar awılı dip äytälär, Saban tuyı uzğan. Bu xaqta Wazifa oyışması citäkçese Xämdiä Ramayıva bolay dip söyläde. (audio)

Şulay itep, Mäskäw ölkäseneñ räsmi Saban tuyı Balaşixada ütkän bulsa, tatar awılları üz Saban tuyların da ütkärgännär. Ä inde bu atna axırında tağı ber Saban tuyı Damodedova awılında bulaçaq.

Näzifä Kärimova, Mäskäw

XS
SM
MD
LG