Accessibility links

чәршәмбе, 7 декабрь 2016, Казан вакыты 21:21

İrandağı prezident saylawlarında xärämläşülär buluğa zarlanular arta


İnde bilgele bulğança, bu comğada İranda prezident saylawlarınıñ ikençe turı uzarğa tieş, bu yulı inde anda berençe turda tawışlarnı iñ küp qazanğan ike nämzät - elekke prezident Äkbär Xaşemi Räfsancani häm Tähran xakime Mäxmüt Äxmädinecad kenä qatnaşaçaq. Alardan azğa ğına qalışqan häm ikençe turğa çığa almağan Mähdi Qarubi isä, İrannıñ ruxi citäkçese ayatulla Xameneigä yazğan xatında, tawış birü waqıtında törle xärämläşülär buldı dip zarlana. Moña cawap yözennän saylaw ähelläre oçraqlı räweştä alınğan 100-läp saylaw sandığın yañadan sanaw kürsätmäsen birde.

İrandağı tormışnıñ här ölkäsen, şul isäptän saylawlarnı da küzätep barğan Bağuçılar Şurası, başqala Tähranda oçraqlı räweştä saylap alınğan 40 tawış salu sandığın, ä Qom, İsfahan häm Mäşhäd şähärläreneñ härbersendä 20-şären yañadan sanap çığu qararın bäyän itte. Şulay itep, barlığı 100 saylaw sandığı tikşereläçäk. Şuşı qarar, prezident saylawlarındağı nämzätlärneñ berse, elekke parlament citäkçese häm urtalıq totuçı ruxani sanalğan Mähdi Qarubineñ, tawış birüdä xärämläşülär buldı digän şikayätenä cawap bulıp tora. İrannıñ ruxi citäkçese ayatulla Xameneigä yullağan xatında Qarubi, ildäge islam inqilabı änsarları häm Basıcı törkeme köçläre tawışlarnı satıp alırğa tırıştı, citmäsä alar ayırım ber nämzät faydasına ügetläw eşläre alıp bardı dip yaza. Yäkşämbedä isä islam inqilabı änsarları, yäğni saqçıları dip atalğan şul köçlärneñ wäkile Qarubineñ bu ğäyepläwlären kire qaqtı häm üzeneñ uñışsızlığın ul başqalarğa yaqmasın dip belderde. Mähdi Qarubi saylawlarnıñ berençe turında öçençe kilde, ämma ul qadimilär nämzäte sanalğan Mäxmüd Äxmädinecadtan bik azğa ğına qalışa dip xäbär itelä. Äxmädinecadnıñ ikençe kilüe küplär öçen kötelmägän närsä buldı. Qarubi fikerençä, bu zur şiklär uyata. Şimbä könne ul bu xaqta bolay digän ide:

Audio, Mähdi Qarubi

"Min bügen ber säğät kenä yoqladım, ber uyanıp kitkäç, qarıym, Bağuçılar Şurası räise näticälärne añlatıp utıra. Şunnan soñ eçke eşlär ministrlığındağı saylaw komissiäse belän elemtägä kerep, alar miña alda Räfsancanineñ baruın, ikençe urında isä min buluın äytte. Häm kötmägändä wäzğiat üzgärde dä quydı " di Qarubi, soñraq ikençe urınğa Äxmädinecadnıñ çığuın iğlan itü xaqında häm üzeneñ şunnan soñ xäzerge prezident Xatami belän bäyläneşkä kerüen, anıñ da monı tikşerü öçen eçke eşlär ministrlığına baruın äytä. Ul arada Mähdi Qarubineñ ayatulla Xameneigä yazğan xatın bastıruları öçen İrandağı öç basmağa düşämbedä tıyu çığuı mäğlüm buldı. Tawış birü waqıtında xärämläşülär bulu ixtimalına İrandağı reformaçılar ğına tügel, tawışlarnıñ älegä küpçelegen cıyğan Räfsancani yağı da işarä itä. Anıñ yaqın tarafdarlarınnan berse Ämir Mohseni "Guardian" basmasına, qadimilär nämzäte Äxmädinecad şul xätle tawış qazanırlıq tanılmağan ide, bu şikle ber närsä dip belderde. Räfsancani üze yäkşämbedä, bar iranlılarnı ikençe turda, "ektremistlarğa" qarşı tawış birergä öndäde. Xäzer Tähran xakime bulıp torğan Mäxmüt Äxmädinecad 2003-nçe yılda şuşı urınğa kilgäç, başqaladağı berniçä mädäniat üzägen ğibadätxanägä äyländergän ide, ul qırıs dini qaraşlarda tora. İrandağı prezident saylawlarınıñ ikençe turı şuşı comğada uzaçaq.

Kärim Kamal
XS
SM
MD
LG