Accessibility links

якшәмбе, 4 декабрь 2016, Казан вакыты 23:33

Tübän Novgorodta milli tormış mäçet häm mädräsä tiräsendä bara


Bötendönya tatar Kongressınıñ eşçe törkeme Tübän Novgorodqa barıp qayttı. Anda mişär tatarlarınıñ milli-mädäni tormışı turında fänni konferensiä, Fäisxanov uquları, şulay uq Nicğar tatar mişärläreneñ IInçe qorıltayı buldı. Bu qatlawlı häm bik qızıqlı waqiğalar ayırım reportajnı taläp itä. Fäisxanov uqularında häm Nicgar tatarları qorıltayında Mäskäwdän, Penzadan, Mordoviädän häm Qazannan wäkillär buldı, anda ölkä gubernatorı Gennadiy Xodırev qatnaştı. Qayberäwlär fikerençä, Nicğar yağında mişär milli kütäreleşe köçäygän. Ämma bu tatar milläteneñ berlegen tarqatmasqa tieş. Şulay uq biredä dini oyışmalarınıñ tatar milli tormışına täfsire bik köçle. Fäisxanov uqularında yañğırağan täqdimnär häm fikerlär tatar milli tormışın oyıştıruğa sizelerlek tä'sir yasarğa mömkin. Tatar häm mişär töşençälären ber-bersenä qarşı quymıyça da, Nicğar töbägen üzençälegen yuqqa çığarmıyça da, millätebezne üsterergä bula, dip sanıylar nicğarlılar.

Axırda Tübän Novgorod diniä näzaräte möftie Ömär xäzrät İdrisovnıñ izge Qör`än Kärimneñ «Yäşen» süräsennän ber ayat belän tanıştırdı. Xalıq üze niät itsä genä, Alla anıñ yazmışın xäl itä. Berkem dä çittän torıp tulı ber xalıqnı äcälgä yäki bäxetkä taba etärmi. Bu ğibrätle xaqiqät. İzge Qör`än iñdergännän soñ, 1500 yıl ütkäç tä, üz ähämiäten yuğaltmağan.

Rimzil Wäli.

XS
SM
MD
LG