Accessibility links

якшәмбе, 4 декабрь 2016, Казан вакыты 03:07

Çığarılış kiçäse küpmegä töşä?


Räsmi töstä, çığarılış kiçäläre 23 iyün könne genä başlanırğa tieş bulsa da, inde respublikanıñ küp kenä mäktäpläre häm yuğarı uqu yortları bügen ük bäyräm itä başladı. Bögelmädä sişämbe könne barlıq çığarılış sıynıf uquçıları öçen zur bäyräm qaralğan. Säğät kiçke unbergä qädär däwam itäçäk kiçägä xätta Mäskäwdän Rusiä cırçısı Anastasiä Stotskaya kiläçäk ikän. Şähär xakimiäte başlığı, ulına,mäktäp tämamlanuına şundıy büläk yasağan dilär. Qaysıdır, ata-analar öçen ulı yäki qızınıñ mäktäp beterüe şatlıq bulsa, ikençelär öçen ul küp problemalar tudıra. Çönki çığarılış kiçäläre soñğı yıllarda nindider bäygegä äylänep bara. Qaysı sıynıf bäyräm öçen kübräk aqça cıyğan, bäyräm nindi restoranda, kafeda uzdıraçaqlar, kemneñ külmäge maturraq, uqıtuçığa kem qimmätleräk büläk alğan. Ber-bereñne uzdıru, maqtanu inde ğädätkä äylänä.

Leninogorski rayonı Şöger awılı mäktäbendä çığarılış kiçäsenä 600 sum cıyğannar. Qazan däwlät universitetınıñ tatar filologiäse fakul'tetın tämamlawçılar da bäyrämne şul bäyägä – 600-700 sumğa töşä dip sanağannar. Dimäk, awıl mäktäbe belän Qazan universitetın tämamlawçılarnıñ çığarılış kiçäläre bär bäyägä töşä ikän. Ä menä Qazannıñ 155нче tatar-ingliz gimnaziäsendä häm şulay Qazannıñ pedagogiä kölliyätendä çığarılış öçen 2 meñ sum cıyğannar.. Qazannıñ 10нчы tatar mäktäbendä ata-analar bäyrämgä bäyä xaqında aldan uq söyläşkännär. Bu xaqta älege mäktäpneñ uquçısı Xälidä Ğiläcewa

Bez bäyrämgä 1 meñ 500 sum cıydıq. Çığarılış kiçäse mäktäptä uzaçaq. Başta bezgä attestat tapşıraçaqlar, annarı klasslarda bäyräm bulaçak äti-änilär belän bergä.

Awılda Sabantuy waqıtlarında ğına xezmät xaqı alğan ata-ana öçen çığarılış kiçäse öçen bireläçäk 600 sum bik zur aqça. Leninogorskinıñ Şöger awılında xätta ata-analar belän klass citäkçese arasında aqça mä’säläsendä ğawğa da çığıp ala. Äle bit külmägen, ayaq kiemen alırğa kiräk. İñ arzan digän külmäk bazarda kim digändä 1 meñ, ä kibettä 4-5 meñ tora dide, satuçılar. Qazan pedagogika kölliyäte qızları, kübese külmäkne prokatqa aluların äyttelär. Bolay ul arzanğaraq töşä ikän. Ber könlek bäyräm öçen genä äle xezmät xaqı da almağan kileş 2-3 meñ qızğanıç dip belderdelär.

Pedagogika kölliyätendä çığarılış öçen cıyılğan 2 meñ aqçanıñ yartısı imtixannar, diplom yaqlaw waqıtında östäl äzerläw öçen, yartısı uqıtuçılarğa büläkkä totıla ikän. Monnan tış 500 sum fotoal'bom öçen östämä cıyğannar.

Uqıtuçılarğa büläk alu öçen dä, ata-ana kesäsennän şaqtıy aqça çığa. Mäktäplärdä qayber uqıtuçılar xätta ayırım büläkne sorap ala digän zarlarnı da işetergä turı kilä. Ämma bu xaqta “Azatlıq”qa söylärgä telämädelär.

Ägär tatar filologiäse fakul'tetın tämamlawçılar çığarılış kiçälären yal bazalarında, teploxodta uzdırsa, awıl uquçıları küp oçraqta anı tabiğät qoçağında tañ qarşılap ütkärä. Qazannıñ 155нче tatar-ingliz gimnaziäse anı zurlap 26нчы iyün könne Ximiklar mädäniät sarayında bilgeläp uzarğa cıyına. Ä pedagogika kölliyätendä çığarılış kiçäsen uqu yortında uzdıru traditsiä bulıp tora ikän.

Üzäk mäğlümat çaralarına qarağanda, Mäskäwneñ mäğärif idäräsendä çığarılış kiçälären restorannarda, kafelarda uzdıru yaramıy digän färman çığardı. Tatarstanda mondıy qarar älegä yuq. Ämma TR Mäğärif häm fän ministrlığı boyırığı belän, uzğan yıldan birle bäyrämdä spirtlı eçemleklär qullanu tıyıla.

Landış Xarrasova

XS
SM
MD
LG