Accessibility links

шимбә, 10 декабрь 2016, Казан вакыты 21:39

Qol Şärif mäçeteneñ açılu tantanasına sanawlı säğätlär qaldı


Qazan şähär başlığı Kamil İsxaqovqa bu könnärdä küp tapqır ğafu ütenergä turı kilä. Qazanğa kilä başlağan din ähelläre, ğalimnär, xalıqara oyışma citäkçeläre, Yevropa Şurası, Dönyanıñ tarixi şähärläre başlıqları da, Qazan başlığı şähärneñ şundıy xalättä buluın kiçerüne sorıy. Qazan xäzer tulısı belän ber tözeleş mäydanın xäterlätä, 1000 yıllıq bäyrämenä eşne tögällärgä tırışabız, añlawığıznı sorıybız, dide 22 yun könne Kamil İsxaqov dönya mirası şähärläre direksiäse utırışında. Qol Şärif mäçeteneñ açılışına, dip kilgän başqala qunaqları da, Qazannı häm mäçet tirälären tözelep betmägän xällätendä kürde. Ber niçä kön rättän bara torğan yañğırlar da tözüçelärneñ eşlärenä qomaçawlıy. «Azatlıq» radiosı xäbärçese comğa könne açıla torğan mäçet yanına barıp, anıñ qunaqlarnı qabul itügä äzerlek däräcäsen qarap qayttı. Qazan Kremle eçennän KamAZ maşinaları çaba, mäçet yanına kilü yulları açılğan, ämma märmär plitälärdän bulası yullar äle äzer tügel, taşlar dä äle cäyelep betmägän. Yaqındağı binalar buyalmağan, ağartılmağan. Köndezge säğätlärdä, Kreml eçendä elektr utı sünderelgän ide, şuña tözüçelär eşlären tuqtap tordı. Alar bik zur tizlek belän eşlärgä mäcbür buluların añlattı. Ämma 24nçe yun irtäsenä eşne tögällärgä wäğdä itte. Yullarğa taş tezü, asfalt cäyü eşläre yañğır astında da bara. Şuşında uq, mäçetne qarap yörgän tatar keçelären oçrattıq. Alar Başqortstannan bulıp çıqtı. Räfis xäzrät häm Filzä xanım, açılış könenä qädär tüzä almağan, mäçetne aldan kilep qararğa bulğan. Alar belän bergä Ufadan kilgän İrek xäzrät Möstayev häm Gölkäy xanım da mäçet tirälären qarap yöri ide. Alar, ata-babaları cirlärenä kilep, mähabät mäçetne kürep, dulqınlanıp yörülären añlattı. Şul arada, Qol şärif mäçeteneñ tışında häm eçendä äzerlek eşläre däwam itte. Törek eşçelär, kolonnalar tota torğan verandağa märmär plitälär yabıştırunı, taşlar tezde. Ä mäçet eçendä, maxsus keçelär İrannan qaytartılğan kelämnär cäyde. «Qol Şärif» müçete binası yanında, läylä çäçägenä oxşağan lampalar quyılğan. Mäçet aldında tribuna quyılğan. Tantanalı açılışqa qäfär sanawlı säğätlär qaldı.

Bikä Timerova.

XS
SM
MD
LG