Accessibility links

Кайнар хәбәр

Rudik İsqucin Başqortstannıñ kiläse prezidentı bulırmı?


Soñğı könnärdä Başqortstannıñ kiläse prezidentı kem bulaçağı turındağı farazlar kiñ cämägätçelek arasında tağın quyırtıla başladı. Xätta täğayın ber qandidatnı da äytälär. Ul – Başqortstan prezidentınıñ Rusiä Federätsiä şurasındağı wäkile Rudik İsqujin. Xäyer, bu imeş-mimeşlär ber yıl çaması elek tä şaqtıy kiñ taralıp alğan ide. Ämma annan soñ, Mortaza Räximov Başqortstan prezidentı wazıyfaların üzeneñ möddäte tulğançı, yağni 2008 yılğa qädär başqaraçağın kisterep äytkäç, bu süzlär tuqtalıp tordı. İnde menä Rudik İsqujinnı tağın da prezidentlıqqa «qodalıy» başladılar. Moña bik cille genä säbäp tä bar, dip añlata bäysez säyäsätçelär.

Mäğlüm buluınça, bu atna başında respublik citäkçelegendä şaqtıy zur üzgäreş bularaq qabul itelgän qadr almaşınuı bulıp aldı. Mortaza Räximov üzeneñ un yıldan artıq tuğrı dustı, uñ qulı, bik täesirle yärdämçese bulğan Ural Baqirovnı wazıyfasınnan aldı. Matbuğatqa çıqqan mäğlümattan kürenüençä, Ural Baqirovnıñ eşennän kitüe anıñ ölkän yäştä buluı säbäple, pensiägä çığuı belän bäyle ikän. Anısı da añlaşıla, çönki Baqirov äfändegä 72 yäş tulğan ide inde. Ämma ike kön dä ütmäde, qayber matbuğat basmalarında respublikta «sorı qardinal» dip yörtelgän aqsaqal säyäsätçeneñ pensiägä tügel, ä ikençe wazıyfağa kitüe xaqında xäbärlär taraldı. Baqsañ, Ural Baqirovnı Başqortstan prezidentınıñ Rusiä Federätsiä Şurasındağı wäkile Rudik İsqujinnıñ yärdämçese itep täğayınlägännär ikän. Menä şunnan soñ respublikta Rudik İsqujinnı çınlap ta Mortaza Räximovqa almaşqa äzerlilär ikän, digän farazlar tağın quyıra başladı. Monda töptän uylasañ, mantıyq ta yuq tügel. Çönki Mortaza Räximovnıñ da, här türä kebek ük, üz urınına üz keşesen, ışanıçlı keşene qaldırası kiläder, möğayın. Ä Rudik İsqujinnı üz urınına äzerläw öçen näq menä Ural Baqirov kebek, yılan ayağın kiskän, täcribäle çinovnik, osta ideoloğ kiräk. Näq menä Baqirov äfände genä Rudik İsqujinnı Başqortstandağı älege rejimnıñ däwamçısı itep tärbiäläp ölgerä ala. Älegä qädär dä Ural Baqirov Başqortstandağı qadrlar mäsäläsen, yuğarı türälärne täğayınläw eşlären asılda üze genä xäl itte. Respublik prezidentı aña bu mäsälälärdä nıqlı ışana ide. Menä xäzer dä Rudik İsqujin yaña prezident itep saylana, yä tağenlänä qalsa, anıñ tiräsenä tağın da Mortaza Räximovnıñ tuğrı yarannarı, älege köndäge teläktäşläre tuplanaçaq. Dimäk, Mortaza Räximovnıñ pensiädäge tormışı da tınıçlıqta häm mullıqta ütäçäk, digän süz bu. Ä Räximov äfändeneñ prezidentlıq wazıyfasın, waqıtınnan alda, şuşı yılnıñ köz aylarında uq qaldıraçağı xaqında süzlär küptän yöri. Xäyer, anı moñarçı da ällä niçä tapqır otstawqağa kitä ikän dip söylägännär ide. Ämma äle üz känäfiendä nıqlı utıra ul. Aldağısın Alla belä.
XS
SM
MD
LG