Accessibility links

шимбә, 3 декабрь 2016, Казан вакыты 20:52

Başqortstan tatarları qorıltayınıñ köçle qaytawazı


İnde xäbär itelüençä, 22 iyün könne Ufada Başqortstan tatarlarınıñ qorıltayı bulıp ütte. Aña äzerlek barışında uq küp kenä şaw-şu çıqqan ide. Räsmi xaqimiätlär bu cıyınnı ütkärergä bina birmäw säbäple barğan bäxäslär, qorıltay ütkäç tağın da köçäyep kitte. Köçle rezonans tudırğan bu qorıltay xaqında üzäk matbuğatta, elektron mäğlümat çaralarında köne-säğäte belän digändäy, baytaq qına yazmalar çıqtı häm äle dä çığa. Bu qorıltayda bula almağan çit il häm Rusiä jurnalistları äle bulsa bu qorıltaynı oyıştıruçılar belän oçraşıp, yañadan-yaña mäğlümatlar ala.

Başqortstan Berläşkän oppozitsiäse citäkçese, Başqortstan Tatar milli-mädäni moxtäriäte räise Ramil Bignov comğa könne dä qayber mäğlümat çaraları wäkilläre öçen matbuğat oçraşuı oyıştırıp, qorıltaynıñ yomğaqları xaqında mäğlümat birde häm Başqortstan tatarları problemnarı turında söyläde. Menä anıñ Başqortstanda tatar telenä däwlät statusı birügä bäyle sorawğa cawabınnan ber özekne tıñlıyq. (Bignov) Sez Başqortstan Berläşkän oppozitsiäse citäkçese, Başqortstan Tatar milli-mädäni moxtäriäte räise Ramil Bignovnı tıñladığız. Ramil äfände matbuğat oçraşuında Başqortstanda yäşäwçe tatarlarnıñ başqa küp kenä könüzäk mäsälälärenä dä qağıldı. Ämma tel statusı mäsäläsenä qabat-qabat qaytıp, monı älege köndä Başqortstan tatarları yazmışı öçen iñ berençel, iñ ütker problem dip assızıqladı. «Bu mäsäläne xäl itmi torıp, Başqortstanda millätara tatulıqqa ireşep bulamayaçaq, – di Ramil Bignov. – İrtäme-soñmı bu mäsäläne barıber xäl itärgä turı kiläçäk. Läkin küpme irtäräk bulsa, şulxätle yaxşıraq, älbättä». Başqortstan tatarlarınıñ şuşı yılnıñ oqtyäbr ayında tağın ber qorıltayı ütäçägen dä äytte Ramil äfände.

Äye, Başqortstan tatarlarınıñ çirattağı qorıltayı bu yulı da meñ bälalär aşa ütte. Häm ul ütü belän, respubliknıñ räsmi matbuğatında anı oyıştıruçılarğa, tatar milli xäräkäte liderlarına törleçä höcümnär yañarıp kitte. Qırmısqa oyasına tayaq tığıp butağannan soñ bula torğan tınğısızlıq quptı. Xäzer inde cäyge aylarğa respublik tatar milli xäräkäte eşçänlege dä beraz süreler, kebek, çönki küp keşe yalğa kitä. Şulay da tatar milli oyışmalarında Qazannıñ 1000 yıllıq yübileyenä äzerlek mäsälälären tikşerü buyınça oçraşular bulıp toraçağın äytälär.

XS
SM
MD
LG