Accessibility links

шимбә, 10 декабрь 2016, Казан вакыты 21:32

İrannıñ yaña prezidentı ütä qädimçe Mäxmüt Äxmädinicat bulaçaq


Iran eçke eşlär ministrlığı ildä prezident saylawlarınıñ comğa könne ütkän ikençe turında Tähran merı Mäxmüt Äxmädinicat ciñep çıqtı dip belderde. Ütä qädimçe Äxmätidnicat 62 protsent çaması tawış cıyğan. Anıñ köndäşe, elekke prezident Äkbar Xäşemi Rafsancaniğa 35.9 protsent tawış birelgän. İrannıñ ruxi yulbaşçısı Ayatulla Ali Xamenei saylawlardan soñ il xalqın ayırmalıqlarnı onıtırğa çaqırdı. Xamenei şulay uq ciñelgän Rafsancaninı da säyäsättä qalırğa öndäde. İrannıñ yaña prezidentı bulaçaq Tähran merı, İnqilab Saqçıları Şurasınıñ elekke äğzası Äxmädinicat prezident saylawlarınıñ ikençe turına çıqqançı İranda ällä ni mäğlüm şäxes tügel ide. Ämma comğa saylawlarında ul elekke prezident, urtaçılraq säyäsätçe Rafsancanını zur östenlek belän ciñde. Äxmädinicat şäriğät qanunnarın tögäl ütäw tarafdarı dielä. Saylawlar aldınnan ul yarlılarnıñ xälen yaxşırtırğa, neft'' keremnären xalıqqa taratırğa wäğdä birde. Eçke eşlär ministrlığı räsmie Reuters agentlığına Äxmädinicat yarlı töbäklärdä ayıruça zur yaqlaw taptı digän.Comğa könne ul il xalqına mondıy möräcäğät belän çıqtı. AUDİO: Bügen, İnşalla bu ilneñ säyäsi tormışında yaña çor başlana. Berençe turda häm bügen saylawlarnıñ ikençe turında xalıqnıñ can atıp häm aqıl belän tawış birüe, İnşalla, ilne iñ yuğarı tärräqiätkä häm alğarışqa iltüçe yaña xäräkätneñ başı bulır.

Moña qädär prezident bulğan reformaçıl Möxämmät Xatami öçençe möddätkä saylana almaw säbäple wazıyfasınnan kitäçäk. Äxmädinicatnıñ ciñüe belän İranda saylanuçı häm saylanmawçı barlıq xakimiät tarmaqları da qädimçelär qulına küçä. Bıltır parlament saylawlarında da alar parlamentta küpçelekne aldılar.

Äxmädinicatnıñ ciñüe ildä reformalarnı kiregä borırğa mömkin dip xalıqnı Rafsancani öçen tawış birergä ügetlägän reformaçılar öçen bu zur orım buldı. Älegä alar yağınnan, şul isäptän Rafsancanidan möräcäğätlär işetelmäde. Ä menä parlament räise, qädimçe Ğölämali Hädäd Adel Äxmädinicatnıñ ciñüe İran xalqınıñ ciñüen añlata dide. Kiçä Rafsancani üze ciñelgän oçraqta ildä probelmalar bulmas dip ışandırıp barıber säyäsättä qalaçağın belderde. Waşington İrandağı saylawlar döres ütkärelmäde dide häm İrannı töbäktäge demokratiägä taba xäräkättän qalışuda ğäyepläde. Däwlät Departamentı süzçese Joanne Moore Könbatış xäbär agentlıqlarına İrandağı saylawlarnı yomğaqlap bez İrannıñ töbäktäge başqa illärdän, Ğiraq, Äfğänstan häm Livanda sizelgän ireklek häm azatlıq xäräkätlärennän qalışuına tağın ber qat inandıq dide. Qayber küzätüçelär Äxmädinicatnıñ ciñüe Tähran belän Waşington arasında elemtälärneñ yaxşıruın qıyınlaştıraçaq dip isäpli. Äxmädinicat üze saylaw aldınnan AQŞ belän mönäsäbätlär xalıqnıñ probelmaların cişmiäçäk digän ide. Dönyadağı iñ zur möselman ile İndoneziä İrandağı saylaw näticälären xuplap İndoneziä İrannı töbäktäge tınıçlıq, totrıqlılıq häm urtaçıl köç kürep aña tayanırğa cıyına dide. Britaniä tışqı eşlär ministrı Jack Straw isä bu saylawlarğa xakimiät tarafınnan küpsanlı tıqışnular buldı dip tänqiläp çıqtı.

Naif Aqmal, Praga.
XS
SM
MD
LG