Accessibility links

шимбә, 10 декабрь 2016, Казан вакыты 00:15

Yewropa Berlege İranğa qarata säyäsäten üzgärtergä aşıqmıy


Yewropa Berlegeneñ tışqı säyäsät öçen cawaplı yuğarı wäkile Javier Solana Berlekneñ İranğa qarata säyäsäten üzgärtü öçen älegä säbäp kürmim di. İranda prezident saylawlarında ciñep çıqqan Mäxmüt Äxmädinicatnı küpläp qädimçe citäkçe dip isäpli. Solana Berlek Tähran belän elekke kileşülärenä üzgäreş kertü öçen başta İrandağı yaña citäkçeneñ ğämällären kürergä tieş. Solana İran belän atom ölkäse turında söyläşülär däwam itäçäk dide. Bügen Brüssel'dä Yewropa Komissiäse süzçese Emma Udwin kiläçäktä İran belän mönäsäbätlärdä iğtibar üzägendä bulaçaq 4 mäs'äläne atadı.

AUDİO: Moñarçı 4 möhim mäs'älä bulıp kilde. Alar küpläp üterü qoralları, keşe xoquqları, terrorçılıq häm Yaqın Könçığıştağı wäzğiät. Bolar kiläçäktä dä bezneñ prioritet bulıp qala häm citäkçelek almaşu belän alar üzgärmi. Şul uq waqıtta Udwin Tährannı comğa könne ütkän saylawlardağı qanun bozular turındağı xäbärlärne tiz häm açıq itep tikşerergä çaqırdı. Londonda Britaniä premyer minsitrı Tony Blair Yewropa Berlege üz mönäsäbäten yomşartmasqa tieş dide häm Tährannı atom ölkäsendä üz östenä alğan yöklämälärne ütärgä çaqırdı. Warşawda Germaniä tışqı eşlär ministrı Joschka Fischer belän Fransiä tışqı eşlär ministrı Philipe Douste-Blazy İrannı uzğan noyäber ayında üz östenä alğan yöklämälärne ütärgä çaqırdı. Ul çaqta İran ägär dä Britaniä, Fransiä häm Germaniä Tährannıñ tınıç atom programmasına iä bulu xoquqın tanısa uran bayıtudan baş tartırğa wäğdä itkän ide.

XS
SM
MD
LG