Accessibility links

якшәмбе, 11 декабрь 2016, Казан вакыты 12:57

Saban tuyı Mäskäwdä


Mäskäw saban tuyı atnasına kerde. 3 iyüldä Bitsa parkında Mäskäw Saban tuyı ütärgä tieş. İnde 9 yıl Mäskäwdä bu olı bäyräm şähär bäyräme bularaq ütkärelä. Şunıñ öçen Mäskäw Meriäsı da bu bäyrämne oyıştıru eşlärendä aktiv qatnaşa. 27 iyün könne Mäskäw xökümätendä Saban tuyda qatnaşa torğan oyışma wäkilläre kiñäşmä ütkärgän. Anda saban tuyınıñ oyıştıru komitetı räise Änwär Xösäenov da qatnaşqan. (audio)

Änwär Xösäenov süzlärenä qarağanda bügenge köngä qadär matdi yaqtan çişelmägän mäsälälär bulsa da, bäyräm uzaçaq. Mäskäwneñ Saban tuyın oyıştıru eşlärendä qatnaşuçı departamentları da – meditsina, eçke eşlär idäräse, MÇS häm başqalar da äzerleklären beldergän. Bıyıl Mäskäw saban tuyında Tatarstan qunaqları bularaq Nurlat rayonı qatnaşaçaq. Alar üzläreneñ üzeşçän kollektivları, säwdä noqtaları büläkläre, köräşçeläre belän kiläçäk dip kötelä. Bıyıl Mäskäw Saban tuyınıñ rejisserı da Qazannan. Älfiä Kärimova Mäskäw Saban tuyların oyıştıruda berençe tapqır ğına qatnaşmıy inde. Ul äle Saban tuyları İzmaylova parkında ütkän waqıtlarda rejisser bulğan ide. İnde bu ike urınnı çağıştırıp qarağanda , İzmaylov parkınıñ ağaçların, Bitsanıñ kiñleklären bergä quşsañ Mäskäw Saban tuyı öçen menä digän urın bulır ide, läkin bügenge köndä cirlekneñ bar yağı kilep betmi şul di Älfiä xanım.(audio) Ä inde Saban tuyı turında ul. Biredä ike tema- Ciñüneñ 60 yıllığı häm Qazannıñ 1000 yıllığı temaları yaqtırtılaçaq, tamaşa küp törle urınnarda kürsäteläçäk dide. Zur mäydanda köräş barsa, keçkenä mäydannarda sänğät ostaları da, üzeşçännär dä çığış yasayaçaq. Älbättä xalıq uyınnarı da ütkäreläçäk.

Şulay itep, 3 iyüldä traditsiägä kergänçä iyülneñ berençe yäkşämbesendä Mäskäwdä saban tuyı uzaçaq. Anda bıyıl başqa yıllardan üzençälekle bularaq tağı ber keçkenä mäydan - ädäbiät çatırı bulaçaq. Anda Mäskäw şağirläre, kompozitorları, yazuçılar, jurnalistlar belän oçraşular kötelä.

Näzifä Kärimova, “Azatlıq” radiosı, Mäskäw

XS
SM
MD
LG