Accessibility links

сишәмбе, 6 декабрь 2016, Казан вакыты 19:03

Milli universitetqa digän binağa kem urnaşır?


Qazan däwlät universitetına sişämbe könne ğariza birüçelär çirat toralar ide. İñ küp ğariza birüçelär älegä yuridik fakul'tetqa. Älege fakul'tetqa 100 keşedän ğariza kergän. İqtisat fakul'tetı da azğa ğına qalışa. Barlığı 84 keşe terkälgän. VMK, tarix, filologiä fakul'tetlarına ğariza birüçelär sanı 60 tiräse bulğan. Qabul itü komissiäseneñ eşçänlege turında anıñ räis urınbasarı Vladimir Gur'yanov

Qabul itü älegä soñara. Çönki bez berdäm däwlät imtixanı buyınça da qabul itäbez. Ä anıñ tanıqlığı äle alarnıñ qullarında yuq. Şuña qabul itülär uzğan yıl belän çağıştırğanda 2 tapqırğa kimeräk. Dokumentlarnı qabul itü 25 yünnän başlandı häm 15 iyülgä qädär däwam itäçäk. Bu atnada säğät irtänge tuğızdan kiçke altığa qädär, ä kiläse atnalarda dürtkä qädär qabul itäçäkbez. Çönki barlıq dokumentlarnı tikşerep elgerergä dä kiräk.

Bıyıl universitetta şaqtıy ğına yaña fakul'tetlar da açılğan Könçığışnı öyränü institutında qıtay tele, filologiä fakul'tetında ispan tele häm ädäbiät belgeçlekläre, VMQa fakul'tetında Mäğlümatı texnologiälär bülege açılğan. Mäğlümatı texnologiälär bülege älegä tüläwle nigezdä genä eşläyäçäk. Ğomumän. qabul itü komissiäläreneñ elenmä mäğlümat taqtalarında fakul'tetlarnıñ byudjet häm kommersiäle büleklärenä küpme ğariza birelgäne könläp yazılıp bara. Tüläwle fakul'tetlarğa kerergä tezläwçelär Qazan däwlät universitetına älegä 20 protsentnı täşkil itä. Tizdän Milli universitetqa dip isäplängän bina da tözelep betep qullanılışqa tapşırılaçaq. Bu xaqta bügen TR Ministrlar Kabinetında Tözeleş, arxitektura häm toraq xucalıq ministrı Marat Xösnullin belderde.

Bu şähär üzägendä urnaşqan mähabät binada älegä nindi yuğarı uqu yortı bulaçağı bilgele tügel. Räsmi bulmağan mäğlümatlarğa qarağanda, 3 uqu yortı - pedagogika universitetı, tatar gumanitar institutı häm tatar-ameriqa töbäk institutın bergä quşıp Tatar däwlät pedagogika-gumanitar universitet buldıru niäte bar digän farazlar. Monı açıqlarğa teläp sişämbe könne “Azatlıq” radiosı xäbärçese Ministrlar Kabinetınıñ mäğärif häm fän idäräse citäkçese Ramil Wälievkä möräcäğät itte. Ul anarda tögäl mäğlümat bulmawın äytte, häm açıqlıq kerter öçen Tatarstan Mäğärif häm fän ministrlıygınnan sorarğa quştı. Ministrlıykta, bu eş belän şöğellänüçe bülek citäkçese Arslan Soltanbäkov turıdan-turı ministrğa möräcäğät itüne soradı. Mäğärif häm fän ministrı Räis Şäyxelislamovnı törle çaralarda qatnaşu säbäple, sişämbe könne eş urınında tota almadıq.

Bu universitet nindi isem yörtäçäk häm ğomumän qabul itü komissiäläreneñ eşçänlege, yañalıqları turında “Azatlıq” radiosı sezgä kiläçäktä dä citkerep torır.

Landış Xarrasova

XS
SM
MD
LG