Accessibility links

шимбә, 10 декабрь 2016, Казан вакыты 08:24

Nurmöxämmät Xösäyenov: “Uquçılarım Qazanda uquları belän ğorurlanalar”


Başqortstannıñ Bäläbäy gimnaziäsen tämamlap, bügenge köndä Qazanda uquçı tatar yäşläre şaqtıy küp. Başqortstannıñ tatar gimnaziäse uquçıları Qazanğa berençe tapqır monnan dürt yıl elek kilgän waqıtta Bötendönya tatar kongressınıñ Qazannan çittä yäşäwçe ömetle tatar balalarına uqırğa kerergä yärdäm itü, xökümätneñ bu eşkä uñay fikere sizelmägän bulğan. Ber yıl uzğannan soñ xökümät dairäläre belän berlektä tatar kongressında qaralğan mäs’äläneñ näticäsendä Başqortstan häm başqa ölkälärdän kilgän tatar balalarınıñ Qazanda belem alu mömkinçelege arttı. Başqortstannıñ Bäläbäy gimnaziäse direktorı Nurmöxämmät äfände Xösäyenov äytüençä, uzğan yılda Qazanğa Bäläbäy gimnaziäsennän kilgän 9 bala uqırğa kerde. Bıyıl inde Bäläbäy gimnaziäsen tämamlağan biş bala Qazan uqu yortlarına dokument tapşırıp yöri. Monnan tış gimnaziä direktorı äytüençä, şuşı könnärdä tağın ike-öç bala Qazanğa kilergä tieş. Başqortstannan kilgän tatar yäşläre nigezdä Tatar gumanitar institutı, Qazan däwlät universitetı, aviatözeleş institutı häm başqa yuğarı uqu yortların saylıy. Tatar yäşläre tuğan yaqtan ayırılıp näq Qazanğa kilä, Qazandağı tatar büleklärendä uqunı qulayraq kürä. Başqortstanda tatar büleklärenä uqırğa kerü bik zur qıyınlıqlar tudırmıy. Bäläbäy şähärendä dä pedagogika institutınıñ filialı eşläp tora. Tik berençedän bu filialda uqu tüläwle. Häm ikençedän inde, tatar yäşläre kübräk Qazanğa milli märkäzgä aşqına. Bez bit üzebez alarnı şulay tärbiälädek - di gimnaziä direktorı – Qazan ul tatarnıñ yözek qaşı dip, xalqıbıznıñ üzäge.
Bäläbäy gimnaziäseneñ direktorı Nurmöxämmät Xösäyenov cäyge yallarda yıl sayın Qazanğa kilep uquçılarına uqırğa kerergä yärdäm itä. Moñarçı balalarınıñ 70-80%tı Qazan uqu yortlarında belem alu bäxetenä ireşte dä. Bıyıl niçek bulır? Waqıt kürsäter.
Al'bina Zäynulla

XS
SM
MD
LG