Accessibility links

Кайнар хәбәр

1000 yıllıq Qazan küz aldında sütelä bara


Qazan üzägendä watıla torğan yortlarnıñ sanı yözlär belän isäplänä. Eş daimi räweştä bara. Şähär üzägendäge xäräbälär, zur tizlek belän arta bara. Çärşämbe könne, «Kazanskie Vedomosti» gäzitendä, şuşı temağa qağılışlı ber äñgämä basılıp çıqtı. Qazanda Yevropa Mädäniäte könnäre barğanda, gäzit xäbärçese Yevropa Şurasınıñ mädäniät häm miras idäräse idäräse başlığı Daniel Teron belän söyläşep alğan. Ul, Evropada da, iske yortlarnıñ cimerelep, ul urınnardağı tarixi möhitneñ yuğaluına qızğanıç beldergän. Ber yortnı cimergändä, keşelärne küçergändä, ul urınnıñ yöze, üzençälege cuyılırğa mömkin. Şähär üzäkläreneñ yaltırawıqlı reklama tulı çüllärgä äylänüen bez soñ añladıq. Qazan şähär başlıqları bu eştä bik aşıqmaslar, dip ömetlänäm, digän Yevropa Şurasınıñ mädäniät häm miras idäräse başlığı. Baqsaq, Qazan da, zur tizlek belän, cimerelä bara. İnde xäbär itkänebezçä, şähär xakimiätlär 300läp binanı yuq itü planın quyğan. Üzäk tanımaslıq däräcädä häm küz aldında üzgärä bara. İnde keçkenä biznes da cayğa salınğan. Ber maşina iske kirpeç häm ağaç 1,5 – 2000 sumğa satıla. Belgeçlelär äytüençä, inde qullanğan tözeleş materiallarına bäyälär könnän kön töşä bara.

«Azatlıq» radiosı xäbärçese Mädäniät ministrlığı qarşındağı tarixi häykällärne saqlaw idäräsenä möräcäğät itte. Şuşı oyışma xezmätkärläre äytkänçä, cimerelä torğan yortlarnıñ isemlekläre şuşı oyışma belgeçläre tarafınnan tikşerelergä tieş. Alar här yortnı ayırım qarap, mädäni qıymäte barmı, yuqmı, cawap qaytarırğa burıçlı. Ämma, älegä tarixi häykällärne saqlaw idäräsendä cimerelä torğan yortlar isemlekläre yuq, şuña xäzerge waqıtta qayda närsä waqıtla häm alar arasında tarixi häykäl bulırlıq binalar yuqmı, bu oyışma xezmätkärläre cawap birä almadı.

Bikä Timerova.

XS
SM
MD
LG