Accessibility links

якшәмбе, 4 декабрь 2016, Казан вакыты 23:33

Üzbäkstan prezidentı Ändican waqiğäläre artında Könbatış tora digän belderülär yasıy


Räsmi säfär belän Mäskäwdä bulıp kitkän İslam Kärimov, uzğan ayda Ändicandağı çualışlar aldan häm çittän torıp oyıştırılğan ide digän belderü yasadı. Anıñ şuşı süzlären soñraq Rusiäneñ prezidentı Vladimir Putin häm saqlanu ministrı Sergey İvanov ta yaqlap çıqtı. Moñardan tış üzbäk prezidentı, çualışlar artında, üzeneñ Üzäk Aziädäge tä''siren arttırırğa omtılğan Könbatışnıñ toruına da işarä yasadı.

Kötelmägän Mäskäw säfären İslam Kärimov, üzeneñ mäğlüm may ayı waqiğälären ilneñ çitlärendä aldan uq äzerlängän ber çara itep kürüen iğlan itü öçen faydalandı. Çärşämbe könne Rusiäneñ saqlanu ministrı Sergey İvanov belän oçraşuı waqıtında ul, Ändicandağı waqiğälär andıy fetnälärne başqa elekke sovet cirlärendä dä äzerläw täcribäse bulğan köçlär tarafınnan centekläp oyıştırılğan ide dip belderde:

Audio, İslam Kärimov

"Ändican waqiğäläre aldan häm citdi itep, bik centekläp planlaştırılğan operatsiä, anıñ näq şundıy uq närsälärne elegräk BDB illärendä häm başqa däwlätlärdä oyıştırğan keşelär wä üzäklär tarafınnan äzerlänüe kön kebek açıq" di Üzbäkstan prezidentı Ändicandağı xalıq kütäreleşe turında. Bilgele bulğança, anda çualışlar bertörkem xalıqnıñ cirle törmäne basıp alıp andağı totqınnarnı azat itüdän soñ başlanıp kitkän ide, soñraq xakimiat binaları da yawlap alındı. Şunnan soñ uramnarğa çıqqan häm şähärneñ üzäk mäydanında cıyılğan meñlägän keşene xökümät köçläre ayıruça qırıslıq belän bastırdı dip zarlana keşe xoquqların yaqlawçı törkemnär. Alar birgän mäğlümatqa qarağanda, Ändicandağı kütäreleşne bastırğanda 500-dän artıq keşe üterelgän, räsmi Taşkent isä bu san 176 ğına dip kilä. İslam Kärimov üz ğäyepläwlären sişämbedä Rusiä prezidentı Putin belän oçraşqanda da yasağan ide, Ändican waqiğälären ul anda Ukraina häm Qırğızstanda xakimiatneñ almaşuına kitergän xäräkätlärgä bäyläde häm turıdan-turı bulmasa da, Quşma Ştatlar Kongressın, NATO-nı häm Yewropa Parlamentın aldan uq Üzbäkstan xökümäten tänqitlägän qarar ölgesen äzerläp quyuda ğäyepläde:

Audio, İslam Kärimov

"Menä şul aldan yazıp quyılğan qarar inde äzerlängän ide, häm küz aldına ğına kiteregez, anı Quşma Ştatlar Kongressı qarap tieşle qararın çığarır ide, Yewropa parlamentı, NATO tikşerer ide" dip ğäyepli Könbatışnı Üzbäkstan prezidentı. Ämma ul moña açıqlıq kertep tormıy, ä andıy qarar ölgeläre äle Ändican waqiğälärenä qädär ük äzerlängän ide digän xäbärlär älegä kürenmäde häm şuña kürä Kärimov süzläreneñ döreslegen raslaw mömkin tügel. Moña qädär üzen Amerikanıñ terrorğa qarşı köräşendä berektäşe dip iğlan itep kilgän Kärimov berençe märtäbä Könbatışnı turıdan-turı Ändicandağı çualışlarnı oyıştıruğa bäyli. Wäzğiatneñ qızıq yağı şunda, soñğı belderülären üzbäk prezidentı Mäskäwdä, Rusiä citäkçeläre belän oçraşular barışında yasadı, Kreml Kärimov ğäyepläwläre xaqında üz yağınnan berni äytmäsä dä, çualışlarnıñ çittän oyıştırıluı xaqında üzendä elek tä mäğlümat buluın xäbär itte. Monı çärşämbedä Sergey İvanov ta qabatladı:

Audio, Sergey İvanov

"Bez çınnan da monıñ niçek äzerlänüen, hiçyuğı şul plannıñ qayber öleşlären belä idek, anda çit bäyläneş açıq kürenä ide häm bu bezgä Ändican waqiğäläre uñayınnan säyäsiläşterelgän tügel, ä riasız ber qaraş aluğa yardäm itte" di Rusiäneñ saqlanu ministrı İvanov. Ändicandağı çualışlarnı oyıştıruçılarnıñ Üzbäkstanğa kürşe Äfğanstannan kerüe xaqında mäğlümat buluın, Rusiä yäşeren xezmätläre xäbärenä tayanıp sişämbedä Kärimovqa prezident Putin dä beldergän ide. Şul söyläşü barışında üzbäk prezidentı Ändican waqiğälärendä qatnaşuçılar xökemgä tartılaçaq dide, mäxkämäneñ çit il küzätüçeläre häm keşe xoquqların yaqlawçılar öçen dä açıq bulaçağın wäğdä itte.

Kärim Kamal
XS
SM
MD
LG