Küptän tügel genä Qazaqstan cirendä, Semipalatinski şähärendä yäşäwçe millättäşlärebez Tatar ictimaği üzägeneñ 15 yıllığın bilgeläp üttelär.13 meñnän artıq tatar xalqı yäşägän bu şähärdä ictimaği üzäkkä nigez saluçılar Gabdelgaziz Äxmerov, Mäxmüt Äbdelkärimov, Nösxatbek Gabdullin bulğannar.
15 yıl däwerendä eşlängän eşlär bixisap, awırlıqlarğa qaramıy küp eşlär ğämälgä aşırıldı, tatar ruxı Semeydä saw kileş saqlanğan, dip ğorurlanıp äytä alabız-, di Gabdelgaziz abıy. Döres, Semeydä tatar üzäge oyışqançı eşlägän oyışmalar da bulğan. 1989 yılda“Tuğan tel” oyışması tözelgän. Bu xaqta anıñ äğzası Räyxangöl xanım İbrahimova söyläde. Älege oyışma qarşında şul uq isemdäge ansambl' eşli. Anı tınğısız yöräkle Xädiçä xanım Sadıykova citäkli. Kollektiv Semeydä yäşäwçe millättäşlärebezne härdaim yaña konsert programmaları belän söyenderä, xalqıbıznıñ borınğı cırların, ğöref-ğadätlären, yolaların saqlawda üz öleşen kertä. Şunsı da iğtibarğa layıq, ansambl'dä yäşlär küp, mäktäp yäşendäge balalar da bar. Anıñ üz dinastiäse barlıqqa kilgän dip äytergä dä mömkin. Ozaq yıllar kollektivnıñ konsertların alıp baruçı Räyxangöl xanım İbrahimovanıñ, mäsälän, ansambl'gä ulı Nadir, kilene Qamilä häm onığı Rafail dä yöri. Ber uñaydan min Räyxangöl xanımnan Semeydä yäşäwçe tatarlarnıñ tormışları-könküreşläre turında soraştım. Bezneñ xalıq ğömer buyı tırış buldı, eşsez yörmäde, awırlıqlardan qurıqmadı -, di Räyxangöl xanım.
İctimaği üzäkneñ bügenge räise, Semey tatar sänğat mäktäbe direktorı Gabdelxak äfände Axuncanov ta milli xäräkätkä yäşlärne kübräk cälep itü zarur di. Ul tatar üzägen häm ansambl'lärne dä yäşlärgä tapşırırğa niätli. Üze yaña plannarın tormışqa aşıru buyınça eşlärgä cıyına.
Tatar ictimaği üzäge qarşında eşläwçe “İrteş moñnarı”, “İstälek” ansambl'läreneñ dä bıyıl 15 yıllığı. Üzäk oyışqannan birle 15 yıl däwamında Semeydä saban tuyları ütkärelep kilä. Bıyılğı, 15-nçe sabantuynıñ da töp oyıştıruçısı - Tatar ictimaği üzäge. Ğadättägeçä sabantuynıñ töp çığımnarın iğänäçelär kütärgän. Şähär xakimiäteneñ dä yärdäme bulğan. Tatar ictimaği üzäge ütkärgän sabantuy, sänğät festivale kebek milli çaralarğa ğädättä Semey aqimı Nurlan Omarov äfände üze kilä. Aqim yubiley sabantuyına da kilgän ide.
Semey sabantuyında Könçığış Qazaqstannıñ tatar awıllarınnan, qayber şähärlärennän küp sanlı qunaqlar qatnaştı. Annan tış Rusiäneñ Novosibirski, Omski, Barnawl şähärlärennän,Tatarstannan qunaqlar buldı. Hämmäse Qazaqstanda ğomer kiçerüçe millättäşlärenä izge teläklären yulladı. Altay kraenda yäşäwçe tatarlarnıñ sälämen Barnawldağı qazaq oyışması wäkile Xayırcan Dösembekov alıp kilgän ide. Ber uñaydan ul bıyıl Barnawl şähärendä dä sabantuy ütkärelüen äytep uzdı, Altay tatarlarınıñ milli – mädäni moxtariät tözüläre turında da xäbär itte.
Tatarstan sälämen semeylelärgä Nicneqamski “Nur” studiäse citäkçese Al'bert İbrahimov citkerde.
Menä şulay tatar xalqı qayda ğına yäşämäsen, mädäniäten, yolaların, ğöref-gädätlären saqlap qalırğa tırışa. Tormış itüdä dä töşep qalğannardan tügel. Bu fikerne äñgämä barışında Semey şähäre aqime Nurlan Omarov äfände dä assızıqladı.
Rozaliä Sayganova, Omski.
