Accessibility links

шимбә, 10 декабрь 2016, Казан вакыты 23:32

Cäy urtasında Qazanda nindi mädäni çaralar uzdırılaçaq


Cäy urtası sanalğan iyül ayında, küplär öçen ul yalğa kitä torğan ay bulsa da, Qazanda mädäniät tormışı görläp tora. Bu atnada bigräk ul iğtibar üzägendä buldı. Ğädättägeçä, cäy başı yıl sayın, mädäniät ölkäsendä bik qızu eş waqıtına äylänä. Çönki bu mizgel teatrlarda , konsert zallarında “sezon yabılu” digän ber sixri moğcizağa äylänep kitä. Sezon yabılu könnärendä yıl buyı säxnälärdä barğan spektakl'lär arasınnan tamaşaçı yaratıp häm bik cılı qabul itkän muzıkal' äsärlär, drama yäki komediä spektakl'läre, konsert programmaları säxnälärdä urın ala.

Ğ.Kamal isemendäge tatar akademiä teatrı belän K.Tinçurin isemendäge drama häm komediä teatrları inde üzläreneñ sezonnarın yaptılar. Şulay uq bu çärşämbedä S.Säydäşev isemendäge Zur konsert zalına tamaşaçını TR Däwlät simfonik orkestrı da cıydı inde.

Ğ.Kamal teatrı, tatar xalqına bik tä xas bulğan ğädätläre, yolaları, uyınnarı iyülläre, sänğät'le bizäkle könküreş äyberlären xalıqnıñ tormışında çağıldırğan bik tä qäderle bulğan K.Tinçurinnıñ klassik äsäre buyınça säxnäläşterelgän “Qazan sölgese”spektakle belän tamaşaçını qänäğätländersä, şul uq könne , yäğni sişämbedä K.Tinçurin isemendäge drama häm komediä teatrı Nazım Xikmätneñ “Mäxäbbät turında riwayät”ye premyerasın kürsätte.

Ä menä Qazanda yäşäwçe tanılğan dramaturg Danil Salixovnıñ ike äsäre respublika şähärlärendäge teatr säxnälärendä quyıldı. Anıñ bersen “Özelgän yözem”äsäre buyınça S.Ömetbaev isemendäge Minzälä drama teatrı artistları uynasa , ikençesen, “Parlı yalğızlar”isemle äsäre buyınça säxnäläşterelgänen , Älmät tatar drama teatrı säxnäsendä çärşämbe könne tamaşaçığa täqdim itelde.

Qazan şähäreneñ meñyıllıq yübiliyın ütkärüe säbäple, şähärneñ ütkäne, bügengese, häm kiläçäge belän bötendönya xalıqlarınıñ qızıqsınuı arta bara. Küp kenä kollektivlar öçen bu çor aldağı iyül ayında törle illärdä baraçaq gastrol'lärgä alıp kitä torğan äsärlärgä berniqädär repetitsiä dä bulıp tora äle. Tatar xalqınıñ mädäniäten başqa xalıqlarğa tanıtunı däwam itü, ul, bigräk tä cawaplı da häm sawaplı eşlärdän sanala. Menä şunı istä totıp, Aydar Fäyzraxmanov citäkçelegendäge TR fol'klor ansamble üzeneñ gastrol'lären Törkiädä Çorum şähärendä başlap cibärde.

TR däwlät cır häm biyu ansamble kollektivı üzeneñ sezon yabu konsertına tamaşaçını Ğ.Kamal teatrı zalına 1 juldä cıydı.

Şulay uq Tatarstan belän Başqortstan bergä oyıştırğan “Böyek Bolğarğa säyäxät” itärgä iyülneñ 4 juldä Ufadan Ağidel buylap paraxut belän Marat Şäripov citäkçelegendäge “Ramazan törki- milli mädäni üzäge” bik küp millättäşlärne alıp çığa. Bu Programma Qazannıñ 1000 yıllığına bağışlana. Alar Tübän Qama, Çallı şähärlärendä millättäşlär belän milli - mädäni oçraşular oyıştırıp, Bolğar tıyulığında ekskursiädä qatnaşıp 11juldä Qazan şähäreneñ Yılğa portına kilep tuqtayaçaqlar. Qazan şähärendä säfärçelär Başqortstan tatarlarınıñ icatı belän tanıştıru maqsatınnan konsert- kiçä kürsätergä cıyınuları turında Azatlıq radiosına internet aşa elektron poçta belän xat cibärep, xäbär ittelär.

İyül ayında mädäniät ministrlığı oyıştırğan mädäni çaralar äle monıñ belän genä çiklänmi.Ädäbiät häm sänğät yaratuçılarnı, Çistay rayonınıñ Yäwşirmä awılında Ğayaz İsxaqiğa bağışlanğan “Ğayaz İsxaqi uquları” dip atalğan muzıyal'-ädäbi tantana kötäçäk.

Azatlıq radiosı Mälikä Basıyr, Qazan.

XS
SM
MD
LG