Accessibility links

шимбә, 3 декабрь 2016, Казан вакыты 14:49

Tömän däwlät universitetın betergän 19 milli belgeçneñ 4 se qızıl diplom aldı


“19ıbız da 7 yul çatında. Älegä berebez dä täğäyen genä kem bulasıbıznı belmi. Diplomnarnı bügen genä aldıq bit”,- didelär Tömän däwlät universitetın beterüçe tatar yegetläre häm qızları. 1nçe iyül könne universitetnıñ filologiä fakul'tetın tämämlağannarğa diplom tapşırdılar. Alar arasında tatar telen häm ädäbiätı belgeçlegen dä üzläştergän 19 keşe bar ide. Läysän Kormanova, Roza Räximova, Güzäl İmametdinova Gölfiä Säfärova qızıl diplom aldı.

-Eş urınnar tabılır dip uylıym. Ämma, menä mäktäpne betergän kebek ük, bez xäzer küp yullarnıñ urtasında torabız. Şul yullarnıñ bersen genä bezgä saylarğa qala.

-Nindi yullar ul? Ägär ser bulmasa...

-Qayberäwlär aspiranturağa keräm dip äytälär. Qayberäwlär eşläp kenä torırbız. Qayberäwlär ikençe uqu yortına kerergä uylıylar.

-Ä menä sin üzeneñ?

-Min üzem ikençe uqu yortına kerergä uylağan idem.

-Ser bulmasa qayda ul?

-Anısı ser!

-Filologiä belän bäylängänme, ällä ekonomika, yuristprudensiä belän bäylängänme?

-Min uylıym ber gumanitar yunäleştä uqıp çıqqaç, inde ekonomika belän dä bäylärgä bula dip.

Qızıl diplomlı Gölfiä Säfärova Yalutr rayonınıñ İsät awılınnan. Universitetta uqığanda uq ul üzen mäktäptä uqıtuçı bularaq ta sınap qaradı. Qırınkül awılı balalarına çit tel uqıttı. Ä aldağı tormışın niçegräk küz allawı turında anıñ tel töbendä närsä yatqanlığın tıñlawçılarıbız añlağandır. Gölfiäneñ diplom eşe dä moña qadär bik az öyränelgän temağa bağışlandı. Tömän tiräsendä yäşäwçe tatarlar süzdäge basımnı ädäbi telgä yaqın itep quysa, sazlıqlar arasında yäşäwçelärneñ üz basımı. Gölfiä alarnı çağıştırdı. Şulay uq qızıl diplom alğan Güzäl İmametdinova Tuqaynıñ rus telennän tatar telenä tärcemäi äsärlären tikşerep çağıştırularnı öyrände.

“Ğomumän bu törkem aldağı çığarılışlardan bik nıq ayırılıp tora”,- di uqıtuçıları, filologiä fännäre kandidatı Maksim Sägidullin.

-Berençedän alar küp ide. Ayırım gruppa bulıp uqıdılar. Alarnıñ ayırım programma ide, başqalarğa qarağanda. Alar yaña programma belän berençe adım buldılar. Tatar tele häm ädäbiätı säğätläre kübräk ide. Törle törki tellärne öyrängän fännär kübräk ide. İkençe üzençälege bolar bik sälätle buldılar. Fän belän qızıqsına idelär. Däresne alıp barasıñ, alar tik kenä yoqımsırap utırmıylar, gel soraw birä idelär.

19 qız arasında 5 yegetneñ dä beterüe filologlar öçen moña qadär bulmağan xäl. Fakul'tet dekanı Lyudmila Letayıwa xisabına küz salsaq, filologlar arasında 11 qızğa ber genä yeget turı kilä ikän.

Annan da qala, moña qadär filologiä fakul'tetında tatar tele häm ädäbiätı belgeçlegen dä üzläşterüçelär arasında gubernator stipendiäse aluçılar bulmadı. Şulay uq qızıl diplom alğan Läysän Kormanova 5 nçe kursta yıl buyı Tömän ölkäse gubernatorı stipendiäsen- 1 meñ 500 sum alıp uqıdı. Universitettağı ğadi stipendiä 460 sum. Läysängä alğa taba uquın aspiranturada däwam itergä täqdim yasadılar.

Tömän däwlät universitetında bıyılğı çığarılış milli belgeçlek aluçılarnıñ 8 nçese buldı. Häm bu 8 nçe çığarılış universitet açıluğa 75 yıl tulğan olı yubileyğa turı kilde.

Nail Alan. Tömän.

XS
SM
MD
LG