Accessibility links

Ütte Saban tuyı Mäskäwdä!


3 iyüldä şawlap görläp Mäskäw saban tuyları da ütep kitte. Oyıştıru eşläre bik zur awırlıqlar belän barsa da, Saban tuyı köne kilep citkäç yärdämçeläre dä tabılğan, bigräk tä Tatneft'neñ Mäskäw bülegenä, Tatarstan qunaqları Nurlat rayonına häm anıñ citäkçese Fatix Sibgatullinga tirän räxmät belderde mäskäwlelär. Çınlap ta 500 keşelek wäkillek belän kilgän Nurlat rayonı bik bizäde Mäskäw saban tuyın. Şunısı qızıqlı, Bitsa atlı sport kompleks yanına quyılğan , biş qatlı yort bieklegendäge çabışta barğan öç atnı surätlägän sınnarnıñ başına Nurlatlılar maxsus käläpüşlär kiderttelär. . Tarixta berençe märtäbä saban tuy qunaqların käläpüşle atlar sını qarşı aldı. Şunıñ östenä Nurlatlılar ağaç büränälärdän yasalğan öç öy dä alıp kilgännär. Alarnıñ bersenä tatar , ikençeñä urıs, öçençesenä çuaş awılı dip yasalğan ide. Şul yortlar yanında äytep ütelgän millätlärneñ kiemnärennän kiengän yeget qızlar cır biü belän qarşı alıp tordılar Ä inde här yort üz milläteneñ yortı kebek bizälgän ide. Mäskäw Saban tuyı tatar başqort Saban tuyı bularaq ütkärelä. Bik küp törle säwdä noqtalarında da Tatarstan häm Başqortstannan kiterelgän mallar qımız ballar. saf'yan çiteklär, çäk-çäk bawırsaqlar satıldı. Ä inde bäyräm bolay başlanıp kitte.(audio) Säxnä türenä başta oyıştıruçılar çıqtı. Annan soñ Mäskäw Tatarstan, Başqortstan, Üzäk Federal okrug räsmilärenä dä süz birelde. Tatarstannıñ premyer ministr urınbasarı häm mädäniät ministrı Zilä Valeeva Tatarstan prezidentınıñ qotlawın citkerde , annan soñ xalıqnı şiğri yullar belän dä qotladı.(audio) Ä inde Nurlat rayonı başlığı Fatix Sibgatullin milli mädäni möxtäriät räise Räsim Akçurinğa Nurlatlar simvolı at suräten büläk itkännän soñ, bez äle İdel Press näşriäte belän berlektä milli üzäk kitapxanäsenä 1050 tatarça kitap ta büläk itäbez dip belderde (audio)Saban tuyı xalıq bäyräme. Bıyıl Bitsa parkınıñ çirämle cirläre dä birelgän ide xalıqqa. Söyläşülärgä qarağanda xalıq elek Saban tuyı ütkän izmaylov parkın sağına ikän.(audio) Germaniädän kilgän Saban tuyı qunağı Venera Vagizova da yäşellekneñ azlığına iğtibar itkän. Şunısın da äytep ütärgä kiräk Venera xanım saban tuyğa maxsus kilgän Germaniädän. Saban tuy mäydanında “Tatarskie novosti” gazetası, “Uzğan yıllar xatiräse” dip atalğan temağa ütkärelgän bäygedä ciñüçelärne dä qotladı. “Nemesneñ tatar qızı Mädinä” dip atalğan mäqäläse belän Venera xanım berençe urınnı yawlap alğan. Min anı bu uñışı belän qotlağannan soñ, Mäskäw Saban tuyı oşıymı dip soradım. Ul şunda uq bıyıl Germaniädä ütkän Saban tuyı turında söyläp kitte.(audio) Saban tuylarında isertkeç eçemleklärgä qarşı köräşüçe Ğayar İskändärov ta bik razıy qalğan bäyrämnän. (audio)Çınlap ta tamaşa öçen säxnälär dä küp ide. Xalıq İlham Şakirovnı da, Zilä Sönğatullinanı da, Xaniä Färxi Ferdinand Säläxov, İdris Gaziev häm başqalarnıñ çığışın alqışlarğa kümep qarşı aldı. Zur säxnädä Başqortstan häm Tatarstannıñ cır häm biü ansambl’läre çığışı yasadı. Bäyrämgä çın tös birep, milli kiemdäge caydaqlar da Saban tuyı mäydanın berniçä märtäbä äylänep çıqtı.

Saban tuyınıñ çın batır bulıp bıyıl, Tatarstan yegete, Nurlattan İldar Gabbasov batır qaldı. Köräş federatsiäse birgän ciğuli maşinası bıyıl Nurlatqa kitte.

Näzifä Kärimova, “Azatlıq» radiosı Mäskäw

XS
SM
MD
LG