Accessibility links

җомга, 9 декабрь 2016, Казан вакыты 12:48

Gruziädäge Rusiä bazasınıñ eçke problemaları da bar


Gruziä parlamentı spikerı Nino Burdjanadze, Vaşingtonda utä torğan Yevropada iminlek häm xezmättäşlek oyışmasınıñ Parlament assambleyasendä qatnaşıp, Amerika Quşma Ştatlarınıñ däwlät sekretare Kondoliza Rays häm Kongress wäkilläre belän oçraştı. Rusiäneñ Gruziädäge xärbi bazaların çığaru probleması turında söyläşte. Häm internettağı KM.ru gazetası xäbärenä kürä, bu söyläşüdän soñ, Burdjanadze Gruziäneñ “İmedi” telekompaniäsenä birgän äñgämädä, Gruziä üz cirennän Rusiä bazaların çığaruda Quşma Ştatlarnıñ yärdämenä tayanuın belderde.

Tömän rayonınıñ Mullaş awılı yegete İldar Babşanov äle yaña ğına Gruziädäge bu bazalarnıñ bersennän- Alxankalakidağısınnan xärbi xezmättän qayttı. Ğadi, iñendä yoldızları bulmağan, kiçäge xärbi küzlegennän qarağan waqıtta, yuğarı däwlätara säyäsi mönäsäbätlärne çitkä quyıp torsaq, bazalarnıñ eçke tormışında da xäyran ğına problemalar bar ikän.

İldar Alxankalakida 1 yıl buyı xezmät itä. Cirle xalıqnıñ bu bazağa mönäsäbäte niçek soñ?

(audio)

-Çığarasıları kilmi mestnıy citel'lärneñ.

-Anda kemnär soñ mestnıylar?

-V osnovnom ärmännär genä.

-Alarnıñ nik çığarasıları kilmi?

-Şunda eşlilär şul bazada. Kontraktniklar küpçelege. Praporşçiklar, ofitserlar.

-Komandirıygıyz kem ide?

-Açalov.

-Açalov niçek dip äytä? Çığarırğa kiräk dime, ällä çığarmasqa kiräk dime?

-Yuq di. Hiç kemneñ çığası kilmi. Çığara başlasalar anda ber texnikası da dörlämi (qabınmıy). Ozaq çığarlar. İskerep betkän. Generallar proverkağa kilälär, “Vse maşinı zavodit'!”,- dilär. Kilep dörlätäbez, qabınmıylar.

İldar süzlärençä, Alxankalaki üze dä, ärmännär yäşägängä kürä, Gruziägä bik buysınıp tormıy torğan däwlät şikelle ikän. “Ber-bersen söymilär alar”,- di ul.

İldar Babşanov Alxankalakiğa kilgänçe Stavropol'dä xezmät itä. Anı Alxankalakiğa färman belän belän cibärgännär. Ber kem dä telägen sorap tormağan. Kitü xäbäre çıqqaç komandirları, aqça eşlärsez dip, küñellären dä üsenderep cibärgän bulğan. Ayına sezgä 200 dollar aqça da tülärlär digännär. Ämma, ayına alarğa 20 ğına tüläp torğannar. “Zur aqça ideme? Närsägä tottığız anı?”,- digän sorawğa ul:

(audio)

-Tämäke birmägännär, bötenläy. Tämäkegä kerep kitä.

ide, di.

12 aylıq bu xezmäte öçen ul tağın barlığı 15 meñ sum aqça alğan. Şunıñ eçennän 5 meñen tuğan yağına küçergännär. Qaytıp kitkändä qulına yul çığımnarı öçen 10 meñ sum birgännär. “Ägär mine saylaw aldına quysalar, Rusiädä xezmät itär ideñme, ällä Gruziädäge bazadamı, dip sorasalar, Rusiädä qalır idem”,- di İldar. Bazada aşaw da alay-bolay ğına bulğan.

(audio)

-Stavropol'dä yaxşıraq ide.

-Närsäse belän ayırıla ide?

-Anda ber yılğa kildem. Ris tol'ko quşali.

-Ä ni öçen alay naçar aşatalar?

-Kilep citmi.

Annan da qala, iñ üzäkkä ütkäne, küplär öçen xezmäteñne tutırğaç ta, qaytıp kitü üze ber problema ikän.

(audio)

-Kemneñ sroğı çığıp quyğan uje qaytırğa, vizası yuq. Viza yasamıylar. Şul vizanı kötep yatalar.

-Ä sin küpme kötteñ?

-Miña äyttelär: “Vizañ bar, qaytasıñ. Minem äle srok ta çıqmağan ide. Kemnärneñ srokları çıqqan şular kötep yatalar.

-Qaytu vizasın niçek yasatalar?

-Kem aqçanı birä, şul tizräk qaytıp kitä.

-Küpme tora inde ul vizanı yasatu.

-100 dollar.

-Ä sin ul aqçanı qayan aldıñ?

-Taptım. Öydän, bu yaqtan, Rusiädän cibärdelär.

-Ä faktta ul vizanı kem yasap birergä tieş?

-Alar üzläre, komandovanie.

İldar Babşanov äytüençä, qaytıp kitkäneñne kötep yatqanda, waqıt ütkärer öçen futbol uynarğa mömkin. Annan da qala täwlek äylänäsendä ORT häm Rusiä kanalların qararğa mömkin. Başqa kanallar Gruziäneke. Ällä nigä ber klublarında kino da kürsätkäläp quyalar ikän. “Bütän käyefne kütärä torğan çaralar da ütkärelmi. Uvol'nenie dä yuq, dedovşçina da yuq”,- di ul.

Nail Alan. Tömän.

XS
SM
MD
LG