Soñğı ike-öç yılda Tatarstanda narkotiklarnı qullanuçılar sanı yıl sayın 2-3 protsentqa arta. 2001 yılda isä bu san 30 protsentnı artqan bulğan. Şulay da tınıçlanırğa äle bik irtä. Bügen narkomaniä diagnozı belän respublika däwalaw yortlarında 7650 keşe terkälgän. Şularnıñ 70 protsentı – 30 yäşkä qädärle bulğan yäşlär. Narkotiklarnı qullanuçılarnıñ real' sanı isä respublikada 70 meñnän 150 meñgä qädär dip isäplänä.
Qazanda ike yıl elek oyıştırılğan narkotiklarnıñ äyläneşen tikşerü buyınça Federal' xezmät idäräse şuşı yıl eçendä genä dä narkotiklar belän bäyle 1200дән artıq xoquq bozu oçrağın terkägän, 52 killogram narkotik aldırğan häm 122 keşegä cinayät eşe quzğatqan. Narkotiklarnıñ äyläneşen tikşerü buyınça Federal' xezmät idäräse xezmätkärläre narkomaniä belän köräşüdä iñ yaxşı ısul dip, älbättä, profilaktikanı atıy. Narkomaniä buldırmaw maqsatınnan respublikada törle çaralar uzdıra. Mäsälän, şuşı könnärdä “Bumerang” digän narkomaniägä qarşı propaganda bäygese oyıştırılğan. 4 iyündä narkotiklarnıñ äyläneşen tikşerü buyınça Federal' xezmät idäräsendä bäygeneñ yomğaqlaw tantanası ütte, ciñüçelärneñ isemlege ataldı. Narkotiklarnıñ äyläneşen tikşerü buyınça Federal' xezmät idäräse räise urınbasarı İldar Şahidullin
Bäygeneñ maqsatı – narkotiklarğa qarşı ütkärelä torğan profilaktik çaralarnı kiñ yaqtırtu, xalıq arasında, bigräk tä yäşlärgä sälämät yäşäw räweşen propagandalau, narkotiklarğa qarşı köräşüdä al'ternativa täqdim itü häm narkomaniägä qarşı politik qararlar çığaruçı däwlät wäkilläre iğtibarın cälep itü.
Älege bäygegä barlığı 70 ğariza birelgän, “Narkomaniägä qarşı basmalar, radiotapşırular”, “Narkotiklarnıñ äyläneşen tikşerü buyınça Federal' xezmäteneñ cämğiättä uñay äymidj propagandalau” kebek nominasiälär täqdim itelgän. İñ küp ğarizalar kilgän “Narkomaniägä qarşı basmalar” nominasiäsendä berençe urınnı “Tübän Qama waqıtı” atnalıq gazetı xäbärçese Yılena Sabaqayıva yauladı. Tübän Qama xäbärçesenä büläkkä 14 meñ sum aqça birelgän. Aqçalata büläklärne başqa sigez nominasidäge ciñüçelär dä aldı.
Al'bina Zäynulla, Qazan.
