Accessibility links

шимбә, 10 декабрь 2016, Казан вакыты 23:37

Nobel’ premiyäse nämzäte Älmirä Ädiätullina: “Min izgelek öçen tuğan”


Tatarstan möselman xatın-qızları ictimaği xäräkäte liderı, “Rusiä islam mirası” xäräkäte prezidium şurası äğzası, “Möslimä” gäzite baş möxärrire Älmirä Ädiätullinanıñ dönyada iminlek, äxlaq öçen köräşüçe meñ xatın-qız belän bergä Nobel' premiäsenä täqdim itelüe xaqında xäbär itkän idek. Älmirä xanımnıñ bu möxtäräm premiägä täqdim itelüenä küplär ışanmadı, bitaraflıq kürsätte. Aq yaulıqlı, tınğı belmäs, gel xalqım dip yanıp-köep yörüçe bu äbineñ qılğan izge ğämälläre isä sanap betererlek tügel.
Älmirä Lotfulla qızı Ädiätullina 1938 yılda Başqortstannıñ İleş rayonı Säyätkül awılında dönyağa kilgän. Barı bişlegä genä uqıp, tuğan awıl mäktäbendä, ä annarı Qazannıñ “Möxämmädiä” mädräsäsendä, Qazan däwlät universitetında starosta wazifaların başqarğan. Älmirä xanım äytüençä, Xoday anı tumıştan uq xalıq belän eşlärgä, fäqät izgelek qılırğa yaratqan. Qazanğa Älmirä xanım 1957 yılda kilgän. Universitetqa kergänçe yäşelçä bazasında yökçe bulıp eşli, sement boçqaların buşata, şul uq waqıtta KDU rabfagında da uqı. Universitetnıñ jurnalistika fakul'tetında uqığanda uq anı Sovet mäktäbe jurnalında, ä annarı “Azat xatın” bügenge “Söyembikä” jurnalına eşkä çaqıralar. “Азат хатын” журналында Әлмирә ханым 30 ел эшли.
Universitetta Watan suğışı tarixın tiränten öyrängän Älmirä xanım ğömere buyı ildäge iminlek öçen köräşä. Suğış barğan iñ qızu noqtalarına barıp, wäxşilekne tuqtatu öçen barlıq köçen birgän, şunda armiägä alınğan küp kenä yäş yegetlären kire qaytarıp, küpme ğömerlär saqlap qala alğan. 1989 yılda Sovetlar Soyuzı ğäskärlären Äfganstannan çığarğan könne dä Älmirä xanım şunda bulğan. Ğäziz ulı ülemen kiçergän Älmirä xanım öçen här soldatnıñ - yäş ğömerneñ özelüe ul härwaqıtta da zur yuğaltu, tözätmäslek xata. Äfganstan gospitalendä Älmirä xanım Tatarstannıñ Tübän Qama rayonı yegeten oçratqan. Suğış afätennän isän qalıp, tuğız operatsiä kiçergän tatar yegete ul waqıtta änise, tormışı belän xuşlaşa.
İminlek, äxlaq öçen köräşüçe meñ xatın-qız arasında Nobel' bülägenä Älmirä xanımnı “Rusiä islam mirası” cämğiäte täqdim itkän. Moña qädär Nobel' bülägen ber genä tatar keşeseneñ dä alğanı bulmadı. Xätta älege büläkkä täqdim itelgäne dä.
Al'bina Zäynulla

XS
SM
MD
LG