Çärşämbe könne "Qazan" milli mädäni üzägendä XV Tatar yäşläre könnäre açıldı. Bişençe iyüldä ük "İdel" yäşlär lagerena törle töbäklärennän poçmaqlarınnan tatar yeget häm qızları cıyıla başladı. Ästerxan, Vladimir, Omsk, Volgograd, Mäskäw, Dağstan, Başqortstannan yäş millätäşlärebez üzläreneñ qan qärdäşläre belän oçraşıp söyläşergä, xalqıbıznıñ mädäniäten, tarixın yaxşıraq öyränergä dip kilgännär. Alar avtobusqa utırıp säğät unberençe yartığa kilep citärgä tieş idelär, läkin şähär uramnarında maşina bökeläre bulu säbäple, yäşlär qırıq minutqa soñğa qaldı.
Bıyıl Tatar yäşläre könnäre ilneñ 30га yaqın poçmağınnan 130 yäş millättäşlärebezne cälep itte. Şundıy küñelle çaranı oyıştıruçılar bulıp TR yäşlär eşläre, sport häm turizm ministrlığı, anıñ qarşındağı "İdel" yäşlär üzäge çıqtılar. Tatar yäşlären tarixi Watannarına qaytarğan Tatar yäşläre könnäre açılışına üz fatixasın TR möselmannarı Diniä Näzaräte räise urınbasarı Wälulla xäzrät Yaqub birde. “Ägär dä inde sez biregä cıyılğansız ikän, min ışanam ki, üzegez tuğan tel, mädäniätebez, dinebez, ruxaniätebez buyınça belemnäregezne üsterersez, kamilläşep kitärsez”.
TR yäşlär eşläre, sport häm turizm ministrı Marat Barıyev Tatar yäşläre könnäreneñ olı maqsatı xaqında äytte.Ul da bulsa, yäşlär aldında torğan problemalarnı çişü, milli üzañıbıznı üsterü, tatar yäşläreneñ añ-belem däräcäsen kütärü, yäşlärne üzara aralaştıru, yal itterü.
Bötendönya tatar kongressı räise Rinat Zakirov ta tatar yeget-qızlarğa zur ömeten bağladı. “Tatar xalqı – berböten xalıq häm telebezne, mädäniätebezne üsterü turında sez uylarğa tieş”, - dide ul. Çirattağı qotlaw süzlären tatar yäşläre könnärendä aldağı yıllarda qatnaşqan, xäzer inde tatar mädäniät dönyasın äydäp baruçılar citkerde. Alar Färğät Mäxmütov, Änwär Nadiev, Marat Fäyzullov, Zöfär Gıyl'fanov, Färit Nurmöxämmätov, Mars Tuqñaev, Zöfär Näcmiev häm başqalar. Şulay uq, Azatlıq yäşlär oyışmasınıñ veteranı bularaq, Wälulla xäzrät Yaqubqa qabattan säxnägä menärgä turı kilde. Tatarstan yaña ğasır radiosı diktorı Miläwşä Nasıybullina bolay dide. “ Bez bügen monda yäşlekne ezläp kildek. Unbiş yıl elek bez qazan däwlät universitetı qarşındağı tabada başlağan şuşı eş yuğalıp qalmadı. Ul inde çit töbäklärgä dä taralğan häm här yıl sayın şulay cıyılıp bara ikän dimäk, bez başlağan eş yuğalmağan. Ä anı yuğaltmaw bügen sezdän tora, çönki millätne saqlap qalıyq disäk, anıñ barlıq ğöref – ğädätlären, telen, dinen saqlap qalırğa kiräk. Şul waqıtta ğına bez millät bulıp yäşi alaçaqbız.
Tatar yäşlären qotlaw çığışları yäş cırçılar Ence Şäymurzina, Färit Fäyzraxmanov, kürenekle tatar estrada cırçısı Azat Xösäinov çığışı belän ürelep bardı. Axırda kümäk cır yañğıradı.
Biş kön däwamında yäşlärne qazannıñ istälekle urınnarı belän tanışu, tatar tarixı, tele turında belemnärne kütärü, tatar spektakl'lären qaraw häm başqa törle mädäni çaralarda qatnaşu kötä.
Gölnaz Şäyxetdinova. Qazan.
