Accessibility links

шимбә, 10 декабрь 2016, Казан вакыты 15:58

Aqça artınnan çabu


Qazannıñ 1000 yıllığın bäyräm itü könnärendä massaküläm mädäni çaralarda altı meñläp student häm mäktäp uquçısı qatnaşaçaq. Alar barısı da icat berläşmäsendä, törle studiälärdä şöğellänüçelär. Yegetlär – qızlar kileşü buyınça eşläyäçäklär häm alarnıñ xezmät xaqı küpme däräcädä eşläwlärenä qarap bilgelänäçäk. Äytik, ägär alar avgust däwamında barlıq çaralarda da qatnaşsalar, biş meñ sumnan da kim almayaçaqlar.

Ä Qazan texnik universitetınıñ Yäşel Üzän filialı studentları, tözeleş otryadlarına berläşep, cäyge aylarda şähärne tözekländerüdä eşläyäçäklär. 56 keşeneñ yartısı şähär küleneñ tirä-yağına çiräm küçerä, ä qalğannarı yortlar tiräsenä qoyma tota. Alarğa “Flora” häm “Dorserwis” oyışmaları eş birä, eş xaqların da muldan tülärgä wäğdä itkän dip yaza Tatarstan yäşläre gazetası.

Eş xaqı digännän, “Время и деньги” gäziteneñ pänceşämbe sanında İdel buyı krizisqa qarşı institutınıñ reyting agentlığınıñ citäkçese Almaz Wafin üz mäqäläsendä Tatarstandağı eş xaqın tüläw burıçların kürsätä. 2005 yılnıñ 1 iyünenä Bögelmä häm Norlat şähärlärendä burıçlar bulmağan, ä menä Tatarstannıñ altı şähärendä burıçlarnı kimetü uñışlı bara. Bu Tübän Qama, Leninogorsk, Bua, Bawlı, Norlat häm Bögelmä. Ä menä Aznaqay, Alabuğa, Qazan häm Yäşel Üzändä eş xaqın waqıtında tulämäwneñ küläme artqan. Ğomumän alğanda, Tatarstanda 2004 yıl belän çağıştırğanda eş xaqı buyınça tüläw burıçı 1.5 tapqır kimegän. Burıçların kimetüdä aldınğılar bulıp Penza ölkäse (35.4 %), Irımbur ölkäse(31.3), Başqortstan (23.4) häm Mari (19.3)respublikaları tora.

Bu cäydä Qazan plyajlarında tuñdırma, gazlı sular, şaşlıq häm başqa tovarlar satarğa planlaştıyrgan predpriätielär bügen küpme aqça yuğaltuların isäpli. Çönki könnär totaş yañğırlarğa kitü häm salqın toru säbäple, Qazan plyajları su qoyınu sezonın aça almıy integä. Monnan faydalanıp, qayber keşelär plyajda tösle metalldan yasalğan qotqaru köymälären, eskämiälär häm xätta balalar öçen qoyınu urının çikläp quyğan kirtälärne dä urlıylar ikän.

Gölnaz Şäyxetdinova. Qazan.

XS
SM
MD
LG