Yun axırında, gäzit-jurnalalrğa yazılu kampaniäse tämamlandı. «Tatarstan poçtası» birgän mäğlümatlarğa qarağanda, bu yartı yıllıqta üzäk federal gäzitlärneñ tirajları artqan, respublika matbuğatınıñ äbünäçeläre şul uq däräcädä qalğan, ä rayon gäzitläreneñ tirajları kimegän. Qaysı gäzit iñ populyär, qaysı matbuğatnı uquçıları üz itä, şunı küpmeder däräcädä, yazılu sannarına qarap, çamalap bula. Yazılu kampaniäsen alıp barğan «Tatarstan poçtası» oyışması bu yartı yıllıqqa berençel näticälärne iğlan itte. Ğomumän gäzit jurnallarğa yazıluçılar sanı 2 millionğa citkän. Tögälräk äytkändä, 1 936738 äbünäçe bar dip sanala. Mäskäw gäzitläre Tatarstandağı quşımtaların buldırıp, cirle xalıqqa yaqınraq bula başladı, dip äytep bula. Tatarstanda «Trud», «Argumentı i faqtı», «Komsomolskaya pravda» gäzitlärenä ayıruça yaratıp yazılalar. Ğomumän, Üzäk gäzitlärne 600 meñ keşe öylärenä aldırıp uqıyaçaq. Qazannan, respublika buylap tarala torğan Tatarstan gäzitlären 1millionğa yaqın keşe uqıy bulıp çıqtı. İñ zur tirajlı gäzitlär bulıp, «Yuldaş», «Tatarstan yäşläre», «Aqçarlaq» kebek basmalar sanala. «Yuldaş» gäziten tirajı 59-60 meñ tiräsendä, «Tatarstan yäşläre»n 49 meñ keşe uqıy. Cırçı Ğäbdelfät Safin çığara torğan «Aqçarlaq» gäzite, soñğı waqıtta tirajın arttıra bara. Sänğät keşeläre, tatar estradası yoldızları turında yazuçı bu gäzit, räsmi, citdi, zur formatlı gäzitlärne artta qaldırıp, äbünäçelär sanı belän uzıp kitte. Aldağı yartı yıllıqta «Aqçarlaq» gäziten 27 meñ keşe daimi öyenä alıp toraçaq.
«Watanım tatarstan» gäzite, räsmi basma bulıp sanala, soñğı waqıtta anıñ eçtälege dä, bizäleşe dä, zamançaraqqa taba üzgärde. Bu üz çiratında gäzitkä yazıluçılarnıñ sanın arttırmasa da, 19 meñläp äbünäçene saqlap qalırğa mömkinlek birde. Gäzit xezmätkärläre, äle tiraj turında näticä yasarğa irtä dip äytä, çönki älegä berençel näticälär genä iğlan itelä. Şäxsi eşmäkär çığara torğan «İrek mäydanı» atnalığı, «Tämle tamaq» gäzite 13 häm 15 meñlek daimi äbünäçese belän maqtana ala. «Söyembikä» xatın-qızlar jurnalınıñ uquçıları beraz kimegän, 17 meñnän, 15 qädär töşkän. «Şähri Qazan» gäzite, qayber mäğlümatlarğa qarağanda tirajın 70% arttıruğa ireşkän. Yaña yartı yıldan şähär tormışın yaqtıruçı bu gäzitne 5 meñ keşe aldıraçaq, dip sanala. Respublika gäzitläre tirajların ber däräcädä saqlap qaldı diärgä bula. Ä menä rayon gäzitläre uquçıları kimi bara. «Tatarstan poçtası» oyışması mäğlümatlarına qarağanda, Zäy häm Mindeleyvskiy rayon gäzitläre 43% häm 47% uquçısın yuğaltqan.
Bikä Timerova.
