Accessibility links

якшәмбе, 4 декабрь 2016, Казан вакыты 04:52

İrek mäydanı serläre


Bügenge räsmi eşlärneñ iñ möhime Rusiä çit eşlär ministrlığı qarşındağı Federatsiä subyektları Sovetınıñ bişençe utırışı. Mäskäwdä çit eşlär ministrlığınıñ zur yortında ütkän bu utırış Qazannıñ meñyıllığına äzerlek qısalarında ütä häm tışqı iqtisadı elemtäläre täcribäsen öyränügä bağışlandı. Älege Federatsiä subyektlarınıñ ministlık qarşındağı konsultataiv şurasın Rusiäneñ çit eşlär ministrı Sergey Lavrov citäkli. Pänceşämbe ütkän cıyılışta M.Şäymiev çığış yasadı. Anda şulay uq T.Akulov, X.Salixov, N.Mirixanov häm başqalar qatnaştı. Söyläşüneñ mäğnäse Tatarstannıñ häm başqa töbäklärneñ tışqı elemtäläre kiñ cäyelä häm eşlär qızu bara digän fikergä qaytıp qala. Qazannıñ meñyıllığına qunaqlar kilgändä Rusiäneñ çit eşlär ministrlığınıñ ixtiramlı mönäsäbäte niçek çağılır, anısın yaqın kiläçäk kürsäter.

Xäzer Tatarstannıñ wäkilçelekläre Germaniä häm Avstriädä, Törkiädä, Amerikada, Çexiädä, Şvetsariädä, şulay uq BDB illärendä häm Rusiä töbäklärendä eşläp tora. Bu atnada Tatarstannıñ Äzerbäycan respublikasındağı wäkile alışındı. Rafael İlyasov pensiägä kitü säbäple bu wazifadan azat itelde, Baqıdağı Tatarstan wäkile itep Nail' Şamil ulı Zaripov bilgelände. Bu şaqtıy qızıqlı häm kötelmägän kandidatura. Nail Zaripov elekke yıllarda Bawlı şähäre başlığı bulıp eşläp, anda zur uñay üzgäreşlärgä ireşkän ide. 1998 yılnıñ mayında Räfqat Altınbaev citäkçelegendäge törkem belän Däwlät Sovetında üzençä yäğni prezident täqdime belän riza bulmıyça bäxäs çığarğannan soñ, Nail Zaripov Bawlı başlığı wazifasınnan alınğan ide. Ul Qazan may kombinatın citäkläde, annarı Penza ölkäsendä gubernator urınbasarı, awıl xucalığı tarmağı citäkçese buldı. Oppozitsiädäge “Tormış” firkäse R.Altınbaev törkeme belän elemtädä torğannan soñ, ul älege şäxeslärneñ säyäsi eşçänlegennän bizde häm alardan waz kiçte. Bik köçle yäş citäkçe bularaq üzen tanıtqan Nail Zaripov Tatarstn Däwlät çinovniğı sıyfatına yañadan qaytqaç, üzeneñ elekke quwäten niçek qaytarır, menä şul baqu-Qazan mönäsäbätlärendä çağılaçaq.

Tatarstan sälämät ministrlığında zur üzgäreş – ul yaña urınğa küçä. Waqıtlıça binada eşlägännän soñ sälämätlek saqlaw ministrlığı Ostrovskiy uramındağı unberençe yortqa küçä. Untuğızınçı ğasır axırında 20 ğasır başında töyälgän bu tarixi bina Klyaçkinnıñ xosusıy klinikası sıyfatında da qullanılğan ide, annarı ul bala tudıru yortı sıyfatında faydalanıldı. Xäzer bäbilär yortları küp, ä ürçem beraz kimi, şuña kürä tarixi häykälne däwlät oyışması qaramağına birep, yaxşılap saqlarğa cıyınalar dilär. Bu bina tatar zıyalılarına bigräk tä yaqın häm bilgele. Çönki biredä 1913 yılnıñ aprelendä böyek tatar şağire G.Tuqay wafat bulğan.

İrek mäydanındağı ministrlar kabinetı ber atna eçendä üzeneñ yañadan qorılğan elekke binasına qayta. Xäzer inde xökümät yortı zamança häm biegräk itep qorılğan. Moña qädär ministrlar kabinetı başta prokuratura öçen tözelgän matur yortta eşläde. Ämma xäzer dä konservatoriä qarşındağı bu binağa prokurorlar kermi, çönki alarğa ikençe yanqorma tözelgän. Şuña kürä bügengä qadär premyer ministr häm anıñ apparatı utırğan binada Tatarstannıñ mädäniät ministrlığı küçä. Şulay itep İrek mäydanındağı binada häm yaqın tirädäge yortlarda xökümät, Däwlät Sovetı, salım inspeksiäse, finans ministrlığı, şähärneñ ratuşası häm mädäniät tarmağınıñ ofisları urnaşaçaq. Döres çinovniklarnıñ sanı qısqara dilär, çönki rayon, şähärlärdä respublika ministrlıqlarınıñ territorial' bülekläre yabılıp, alar cirle üzidarägä küçä. Yäğni däwlät çinovniklarınıñ sanı meñ yarım keşegä qısqarırğa tieş. Täcribäle keşelär ğädättä çinovniklarnı qısqartu alarnıñ sanın arttıruğa kiterä dilär. Härxäldä Sovet zamanı belän çağıştırğanda rusiädäge bu san bik küpkä arttı. Xäzergä böten çinovniklarınıñ başı häm ayaq qulları meñ yıllıqqa äzerlek häm cirle üzidarägä saylawlar belän bäylängän. Oktäber axırına qädär alarğa yal yortları häm Klyaçkin, Şamov xastaxanälären häm başqa şäfqätle urınnarnı onıtıp torırğa turı kiläçäk.

Rimzil Wäli

XS
SM
MD
LG