Accessibility links

дүшәмбе, 5 декабрь 2016, Казан вакыты 11:35

Bakiyev yaqlı aktiv yäşlär närsä söyli?


Görcstan häm Ukrainada törle töstäge inqılaplarda yäşlär möhim rol uynadılar. Qırğızıstandağı Mart vaqiğälärennän elek Kel-kel häm Birgä isemle yäşlär oyışmaları oyıştırılğan ide. Qırğızıstan xalqınıñ 56 protsentın yäşlär täşkil itä. Azatlıq xäbärçese 10-nçe iyüldäge prezident saylaularınnan alda Bişkäktä xäzerge vaqıtlı citäkçe Kurmanbek Bakiyevne yaqlauçı qayber yäş citäkçelär belän söyläşte.

Bakiyev yaqlı yäşlär törkemeneñ baş kvartirı Bişkäkneñ üzäk Gorki maydanında urnaşqan. 10-ğa yaqın keşe, nigezdä yäşlär Bakiyevneñ kandidatlığın propogandalau belän mäşğüllär. Rıskul Cumabayev häm Alesander İvanov üzlären yäşlär üzägeneñ citäkçeläre dip tanıtqannar. Cumabayevqa 32 yäş häm ul Bakiyev tuğan yaqtan. Ul yäşlär xäräkätenä qatnaşuınıñ säbäben bolay dip añlata.

Audio

"Ul bezgä küptännän tanış. Kurmanbek Saliyevic Bakiyev oppozitsiäne berläşterä alğan berdön ber şäxes buldı häm ul çitlätelgän Akayev rejimına qarşı köräşte . Oppozitsiä törkemnäre küp bulsa da, ul alarnı berläşterde, alar häm xalıq belän citäkçelek itte. Şul säbäple anı yaqlıybız."

29 yäşlek İvanov Bakiyev yaqlı yäşlär üzägen oyıştıruınıñ maqsäten bolay dip añlattı.

Audio

"Bez prezident saylauları kebek möhim politik häm tarixi vaqiğä aldında torabız. Bu märtäbä bezneñ saylaularğa mönäsäbätebez başqaça bulırğa tieş. Şul säbäple bez dä Ukraina häm Görcstandağı xalıq başkütärüennän ürnäk alıp ğädättäntış närsä oyıştırırğa buldıq. Ul inqılaplarn artında jäşlär tordı. Alar Kıiv maydanında utırıp , üz xoquqları , üz pozitsiäse häm üz prezidentı öçen köräştelär. Bez dä şul säbäple bu maydanda üz bazabıznı buldırdıq."

Bälkim İvanov Kıivneñ Maydanı belän Bişkäkneñ Gorkı maydanı arasında oxşaşlıq turında xıyllanadır. Läkin, prezident saylaularına öç kön qalğanda küzgä çağılırlıq oxşaşlıq yuq. Ul keçeräk tä häm buşıraq ta. İvanov yäşlärne cälep itü öçen kino kürsätelä, konsertlar oyıştırıla dip belderde. Ul Bakievneñ baştağı programmasında yäşlärgä ayırım törkem bularaq ähämiät birelmägän ide. Bez yäşlär öçen mäxsus programma äzerledek häm ul xäzer Bakiyev programmasınıñ ber öleşe dip belderde.

Audio

Läkin, yäş saylauçılarnı cälep itü öçen yäşlär programması ğına citmäs. Bakiyev yaqlı yäşlärneñ çatıdrına kilüçelär bik az häm Gorki maydanı da älegä nigezdä buş.

Färit İdelle, Praga.
XS
SM
MD
LG