Accessibility links

якшәмбе, 4 декабрь 2016, Казан вакыты 17:18

Başqortstan Tatar Kongressı Başqarma Komitetı bürosı utırışı ütte


Comğa könne Ufada Başqortstan Tatar kongressı Başqarma qomitetı byurosınıñ çirattağı utırışı bulıp ütte. Anda kön tärtibenä Tatar kongressı tiräsendä soñğı könnärdä kilep tuğan törle ığı-zığı häm räsmi xaqimiätlär tarafınnan tatar milli xäräkätenä qarşı oyıştırıluçı çirattağı höcümnärgä, törle basımnarğa bäyle söyläşü, şulay uq Qazannıñ 1000 yıllıq yübileyenä baraçaq keşelärneñ isemlegen raslaw mäsäläse kertelgän ide.

Başqortstan Tatar kongressı Başqarma qomitetı räise Ruşan Ğallämov utırışnı açıp, bügenge wäzğiät belän tanıştırdı. Anıñ süzlärençä, respublik xaqimiätläre Tatar kongressı Başqarma qomitetınıñ elekke räise Eduard Xämitovnıñ urınına üzläre telägän kündäm keşene quya almağaç, üzläreneñ ciñelüe belän haman kileşä almıy häm tatar milli xäräkätenä törleçä ayaq çalırğa tırışa. Bu xilaf ğämällärdä respublik türäläre Başqortstan Tatar kongressı Başqarma qomitetınıñ qayber äğzaların da faydalana. Elek tä Eduard Xämitov tarafdarları bulğan qayber keşelär isemennän şuşı könnärdä qabul itelgän bilgele möräcägät xäzer respubliknıñ barlıq räsmi gäzitlärendä basılıp çıqtı. Alay ğına da tügel, tatar milli xäräkätenä pıçraq atuçı başqa yazmalar da kön sayın dönya kürep tora. Xätta qayber çığanaqlardan alınğan mäğlümatlarğa kürä, Başqortstan türäläre yaña saylanğan räisne alıp taşlap, Kongressnıñ yaña Başqarma qomitetın oyıştıru omtılışları belän dä yana ikän. «Ämma monıñ belän respublik citäkçelege añlaşıp eşläwgä tügel, ä, kiresençä, kierenkelekne arttıruğa ğına bara, – di Ruşan äfände. – Bezneñ Başqarma qomitet 2003 yılda uq saylanğan legitim oyışma häm bez bar eşçänlekne qanun qısalarında alıp barabız. Tatar xalqı mänfägätlären, bernigä qaramıy, kiläçäktä dä yaqlayaçaqbız».

(Ruşan) Sez Başqortstan Tatar kongressı Başqarma qomitetı räise, professor Ruşan Ğallämovnı tıñladığız. Byuro utırışında başqa äğzalar da çığış yasadı häm äle tatar milli xäräkätenä qarşı başlanğan yaña höcümnär dulqını turında üz fikerlären yañğırattı. Başqortstan Tatar Kongressınıñ Salawat şähäre bülege citäkçese Äsgät Qormanayıv fikerençä, Başqortstanda tatar başın barı tik tatar ğına aşıy. Başqortstan Tatar kongressı Başqarma qomitetında tatar millätenä faydağa tügel, ä zıyanğa eşläwçe tatarlar da baytaq. Näq menä şularnı räsmi xaqimiätlär tatarnıñ üzenä qarşı küsäk itep faydalana. Menä Äsgät äfänedeneñ çığışınnan ber özek.

(Qormanayıv)

Sez Başqortstan Tatar kongressı Başqarma qomitetı äğzası Äsgät Qormanayıvnı tıñladığız.

Byuro utırışında qatnaşuçılar kön tärtibendäge ikençe mäsäläne dä tikşerde:Qazannıñ 1000 yıllıq yübileyenä baruçılarnıñ isemlegen rasladı. Millät märkäzeneñ 1000 yıllıq yübiley tantanalarına Başqortstan tatarlarınıñ 160 wäkile baraçaq. Altmış keşelek ber törkem 28 augustta yulğa quzğalıp turı Qazanğa bara. Ä 100 keşelek ikençe törkem, şulay uq 28 augustta yulğa çığa, ämma andağı millättäşlär Tatarstannıñ Aqtanış häm Bawlı rayonnarı aşa ütkändä, mädäni proğrammalar belän çığış yasıy. Şağirlär, yazuçılar, sänğät ostaları, ğälimnär kergän bu törkemneñ isemlege dä bügenge utırışta raslandı.

Fänis Fätxi, Ufa.

XS
SM
MD
LG