Accessibility links

җомга, 9 декабрь 2016, Казан вакыты 20:22

London şartlawlarında hälak bulğannar sanı arta, läkin tormış ğädäti xälenä qayta bara


Atnakiç Londonnı ğına tügel, bar dönyanı teträtkän şarlawlar öçen kem cawaplı? Xäzer alıp barılğan külämle tikşerü şuşı sorawğa cawaplar ezli. Kimendä 50 keşeneñ ğömeren özgän häm 700-dän artığın cäräxätlägän şuşı terror ğämällärendä mäğlüm "äl-Qaidä" törkemeneñ eze sizelä dip belderä älegä britan räsmiläre.

Londondağı şartlawlar tudırğan tetränü keşelärdä äle küpmeder saqlansa da, xäzer inde anıñ näticälären açıqlaw, artında kemnär toruın belergä tırışu alğa çığa. Zur Londonnıñ politsiä başlığı İan Blair comğa könne ütkärgän matbuğat oçraşuında "xäzer bez bik qatlawlı häm ozaqqa suzılaçaq tikşerenü aldında torabız" dip belderde:

Audio, İan Blair

"Min xäzer yasıy alırlıq iñ möhim belderü bulıp şähär politsiäseneñ şuşı qotoçqıç ğämällär öçen kemneñ cawaplı buluın açıqlarğa äzerlegen xäbär itü tora" di Zur London (Metropolitan) politsiäse başlığı. Älegä şuşı şartlawlar öçen cawaplılıqnı moña qädär bilgele bulmağan, ämma üzen radikal'' islamçılarğa bäylägän ber törkem alğan ide. Ul näq şundıy uq terror ğämällären İtaliä häm Daniägä qarşı da oyıştıraçağın wäğdä itä. Mäğlüm bulğança, şuşı illär Quşma Ştatlar belän bergä Ğiraqta üz ğäskärlären tota. Britaniäneñ eçke eşlär ministrı Charles Clark, xökümät bu yanawlarğa häm ğomumän, älege törkemneñ cawaplılıqnı üz östenä aluına bik citdi qarıy dip belderä. Ä politsiä başlığı ul arada barlığı dürt şartlawda zian kürgän qorbannar sanına da açıqlıq kertte:

Audio, İan Blair

"Şuşı mizgeldä bez 50-dän artıq keşeneñ hälak buluın äytä alabız. Ülem-citemne tögälräk açıqlaw bik qatlawlı, çönki şartlaw bulğan ike urınnı çistartu şaqtıy awır" di İan Blair, London politsiäse başlığı. Radiobıznıñ britan başqalasındağı xäbärçese Robert Parson süzlärenä qarağanda, London xalqınıñ zur öleşe atnakiç tetränüennän inde ğädäti tormışqa qayta başlağan:

Audio, Robert Parson

"Minemçä, Londonda xäzer härkem qullanğan süz, ul "stoik", yäğni ärnügä bitaraf bulu süze. Härkem ni genä bulmasın üz tormışın däwam itärgä äzer. Kötelgängä qarşı London metrosı bügen normal'' eşli baladı. Bombalar şartlağan qayber liniälär yabıq, ämma qalğan öleşe ğädättägeçä eşläp tora" dip sürätli britan başqalasındağı ğomumi wäzğiatne radiobız xäbärçese Robert Parson. Dönya buylap isä Londondağı terrornı xökemläw däwam itä. Tieşle belderülär belän Könbatış illäre genä tügel, Äfğanstan, Ğiraq, İran, başqa möselman illäreneñ citäkçeläre dä çıqtı.

Kärim Kamal
XS
SM
MD
LG