Accessibility links

якшәмбе, 4 декабрь 2016, Казан вакыты 07:04

Politsiä: London metrosındağı öç bomba da berniçä mizgel ayırma belän genä şartlağan


Londondağı şartlawlarğa inde ike kön ütep kitte, anda xäzer ezlänülär ike yünäleştä bara - metroda äle dä qalğan dip farazlanğan ülüçelärneñ cäsadları häm şuşı terror ğämällären qıluçılarnı.

Audio, metro

Atnakiç 3 şartlaw kiçergän London metrosı öleşçä genä bulsa inde ğädäti eşenä qayttı. Politsiä ülüçelär sanın 50-läp dip bilgeläsä dä, bu sannıñ artuı ixtimal dip belderä. Cir astında äle haman da ezlänü eşläre bara, monıñ şaqtıy awır eş buluı açıqlandı, çönki Russell square stansiäse yanında tunelneñ işelü qurqınıçı bar dip äytelde. Şuşı ezlänü belän bergä ikençese da däwam itä - xakimiat älege höcümnärne kemnär oyıştırğanın, monıñ radikal'' islamçılarğa bäyle bulu-bulmawın tikşerä. Politsiä süzlärenä qarağanda, ul zur iğtibar belän "äl-Qaidäneñ Yewropa cihadı" digän yäşeren törkem isemennän yasalğan belderüne tikşerä, cawaplılıqnı üz östenä näq menä ul alğan ide. Moña inde tağın ike törkem östälde, häm alar da "äl-Qaidä"gä yaqın tora dip farazlana. Britan basmaları şimbä könne berençe şikle keşe turında yazıp çıqtı, ul üze Maroctan häm ul ike yıl elek Casablancadağı şartlawlarnı oyıştıruda da şiklänelä dip xäbär itelä. Politsiä bu xaqta älegä berni dä beldermäde. Şimbä könne anıñ ber wäkile Brian Paddick barı tik, tikşerenülärneñ niçek baruı xaqında tübändägene genä äytte:

Audio, Brian Paddick

"Texnik tikşerenülär näticäsenä häm berniçä şahidneñ belderüenä qarağanda, London metrosındağı öç bomba da berniçä mizgel ayırma belän irtänge 8.50-dä şartlağanğa oşap tora" di London politsiäse wäkile. Şuşı höcümnärneñ berük diärlek mizgeldä yasaluın iskä alıp, şartlatu öçen säğät caylanması qullanılğan bulu ixtimalı zurraq, digän näticä yasıy älegä Paddick, ämma bolarnıñ intihar höcüme bula aluın da ul kire qaqmıy.

Audio, Brian Paddick

London xalqı isä höcümnärneñ küpsanlı qorbannarğa kiterüe uñayınnan qayğıruı belän bergä, üzeneñ qurquğa birelmäwen, tormışnıñ däwam itüen belderä.

Audio, Mark Tyler

"Sez alğa barunı däwam itärgä tieşsez, sez mondıy ğämällärneñ üzegezne qurqıtuğa yul quyarğa tieş tügel" di Londonda yäşäwçe Mark Tyler. Britan xalqınıñ faciğäne sabır ğına kiçerüen premyer-ministr Tony Blair dä maqtıy. Şimbä könne ul üz xökümäteneñ şartlawlarğa cawap yözennän iminlek ölkäsendäge qanunnarnı tağın da qırıslatırğa cıyınmawın äytte. Blair fikerençä, iminlek şartların qırıslatu ğına keşelärne andıy höcümnärdän qotqara almıy, monıñ öçen bar dönya terrorğa kitergän säbäplär - fäqirlek, demokratiäneñ citeşmäwe, Yaqın Könçığışta däwam itkän nizaq belän köräşergä tieş dip belderde.

Kärim Kamal
XS
SM
MD
LG