Accessibility links

җомга, 9 декабрь 2016, Казан вакыты 03:03

Samar başqortlarınıñ ğorurlığı


Samar töbägendä un meñ tiräse başqort yäşi häm, äytergä kiräk, ägärdä ike xalıq sanın alu arasında Samar ölkäsendä tatarlar sanı 10 meñgä artsa, başqortlar şul çamada qaldı. Ölkädäge başqortlarnıñ küpçelege uqmaşıp Zur Çernigovka rayonında yäşi. Menä şul rayonnıñ Xäsän awıl başqort millätenä yazuçı Xädiä Däwlätşinanı büläk itte.

Bıyıl iyül ayında Xädiä xanım Däwlätşinanıñ tuuına 100 yıl tulu uñayı belän yaqtaşları cıyın uzdırdılar. Tantana rayonnıñ Xäsän awılında başlanıp, Zur Çernigovka awılında däwam itte. Şul tantana turında Samara duslıq yortındağı başqort mädäniäte belgeçe Gölsiä tutaş Musina bolay dide:

“ İyülneñ ikesendä Zur Çernigovka awılında bezneñ böyek şäxesebez, ataqlı “ Irğız” romanı avtorı Xädiä apa Däwlätşinanıñ 100 yıllığına bağışlanğan milli bäyrämebez “ Cıyın” uzdırdıq. Bıyılğı bäyrämgä Ufa qalasınnan tanılğan yazuçılar- Rawil Bikbaev, Kädim Aralbaev, şağirä Yomabikä İl'yasovalar kilde. Şulay uq “ Başqortstan” televideniesennän, “Ağidel”, “Başqortstan qızı” jurnallarınnan da wäkillär buldılar.

Kilgän qunaqlar äwwäl Xäziä Däwlätşinanıñ tuıp- üskän Xäsän awılına barıp miting ütkärdelär. Anda tawğa menep yoldızlar cıydılar, xalıq monı yaxşığa yurıy. Xäsän awılınnan soñ barlıq qunaqlar da Zur Çernigovqa awıl mädäniät Sarayına cıyıldılar. Biredä qunaqlarğa zur konsert programması kürsätelde. Samar qalasınnan “Läysän” törkeme, Zur Çernigovkadan- “Tuğan moñnar”, “Qıñğırawlar” isemle kollektivlar çığış yasadılar. Xalıq quandı, küñel açtı, artistlar şayan cırlar başqarğanda, tamaşaçılar üzläre dä bii başladılar. Bäyräm bik uñışlı ütte, qunaqlarğa da oşadı, alar bik qänäğät bulıp qaytıp kittelär. Bez, Samar başqortları, yaqtaşıbız Xädiä Däwlätşina belän ğorurlanabız, anıñ talantına baş iäbez.”

Gölsiä tutaş söylägännärgä şunı ğına östise kilä, Xädiä Däwlätşinanıñ 100 yıllığın oyıştıruda köç quyuçılar isemlegendä: Samar ölkäseneñ mädäniät häm yäşlär säyäsäte ministrlığı, Zur Çernigovka rayonı administratsiäse, Samar ölkäseneñ Dusçılıq yortı häm ölkä başqortlar oyışması.

Şamil Baxautdin, Samar.

XS
SM
MD
LG