Accessibility links

Кайнар хәбәр

Srebrenicada 10 elek bulğan wäxşätne iskä alu ütte, anda Serbiä prezidentı da qatnaştı


Düşämbedä Bosniäneñ Srebrenica şähärendä 10 yıl elek bulğan wäxşät qorbannarın iskä alu yolası uzdı. 1995-nçe yılnıñ yülendä Bosniä serbları köçläre Berläşkän Millätlär sağındağı Srebrenicanı yawlap alğaç, anda 7800-läp möselman ire häm yäşüsmere üterelgän ide. Düşämbe çaraları arasında şuşı wäxşätkä kiterüçe tarixi şartlarnı tikşergän konferensiä häm kemlege açıqlanğan 600-läp qorbannı yañadan maxsus xäter ziratına cirläw dä bar ide.

Audio

Şuşı azan düşämbe könne Srebrenica üzänenä cıyılğan 50 meñläp keşe öçen genä tügel, anda näq 10 yıl elek bulğan qırılışnıñ meñnärçä qorbanı xaqına da yañğıradı. 1995-neñ yülendä Bosniäneñ şuşı şähären yawlap alğan serb köçläre anda 8 meñgä yaqın möselman iren häm yäşüsmeren üterep çıqqan ide. 11-nçe yüldä uzğan xäter yolasında şul dähşättä isän qaluçılar, qorbannarnıñ ğailä äğzaları ğına tügel, çit ildän kilgän mäğlüm şäxeslär, Bosniäneñ öç mäxällä - möselman, serb häm xorvat wäkillärennän torğan citäkçelege dä qatnaştı. Alar arasında Bosniä suğışın tuqtatqan Dayton kileşüen äzerläwçe elekke amerikan ilçese Richard Holbrooke, Xorvatiä prezidentı Stipe Mesiç häm xätta Serbiä prezidentı Boris Tadiç tä bar ide. Tadiçneñ kilüe bigräk tä zur ähämiatkä iä waqiğä buldı. Suğış waqıtında Bosniä serbların berençe çiratta näq menä Serbiäneñ millätçel citäkçelege yaqlağan ide. Belgradtağı serb millätçeläre xäzer dä Boris Tadiçneñ Srebrenicağa baruın telämäde, ämma ul alarğa, "min anda qılınğan cinayätneñ ğäyepsez qorbannarı ruxı xaqına baram" dip belderde. Üzeneñ şuşı säfären Tadiç ğomumän, Balkanda urnaşqan zolım äylänäsen özü öçen kiräk dip añlattı. Düşämbe yolasında töp waqiğä bulıp, küptän tügel genä isemsez qaberlärdä tabılğan 610 möselmannıñ cäsadın yañadan cirläw buldı. Tieşle dini yolalar ütkärelgännän soñ berençe bulıp çığışnı Bosniä citäkçelegendäge möselman wäkile Söläyman Tihiç yasadı. Ul un yıl elek bulğan wäxşät öçen Berläşkän Millätlär Oyışması da cawaplı, çönki näq menä ul moña yul quydı dip belderde.

Audio, Söläyman Tihiç

"Xaqiqät xaqına, häm bu kiläçäkneñ yaxşıraq buluına ber şart bulıp tora, bügenge waqiğä uñayınnan häm bu urında min yänä, imin urın sanalğan cirdä Berläşkän Millätlär keşelärne saqlap qala almadı dip qabatlarğa tieşmen. Ul alarnı Drina yılğasınıñ ike yağınnan da kilgän serb köçlärenä tapşırdı, aları isä biredä 7 808 möselmannı yuq itte" dip belderde Bosniä räislegendäge möselman wäkile Tihiç. Qorbannarnıñ ğailä äşzalarına häm bigräk tä çittän kilgän räsmi şäxeslärgä ul şulay uq, ğadellekneñ äle haman da çınğa aşmawın - Srebrenica wäxşäte öçen cawaplı zatlarnıñ xökem itelmäwen iskä töşerde.

Audio, Söläyman Tihiç

"Sezneñ söyekleläregezne inde berkem dä qaytara almıy, di Söläyman Tihiç Srebrenica wäxşäten kiçergän xalıqqa möräcäğät itep. "Bezneñ xäldän kilgän berdänber eş - isemnäre açıqlanmağan qorbannarnı tieşle xörmät belän cirläw häm şuşı cinayät öçen cawaplılarnı, bigräk tä suğış cinayätçeläre Karadziç häm Mladiçne cawapqa tartu" dip belderä Bosniä citäkçelegendäge möselman wäkile Tihiç. Srebrenica wäxşäte näq menä Bosniä serblarınıñ ul çaqtağı şuşı ike yuğarı citäkçese - Radovan Karadziç häm general Radko Mladiç tarafınnan oyıştırılğan dip farazlana, ä alar ikese dä älegä haman qayadır qaçıp yäşi.

Kärim Kamal
XS
SM
MD
LG