Accessibility links

пәнҗешәмбе, 8 декабрь 2016, Казан вакыты 23:02

Çit illärgä barıp eşläw ciñelme? Omskidan Portugaliägä säyäxät


Tatar keşese ğömer baqi yaxşı, matur tormış qorırğa omtılğan. Yäşägän cirendä layıqlı tormış qorırday eş tapmasa, çitkä çığıp kitärgä dä küp uylap tormağan. Äle ölkännär xäterlilärder, uzğan ğasır urtalarında täwäkkäl ir-yegetlär Yıraq Könçığış, Ural, Kuzbass yäki Donbass yaqlarına eşkä kitälär ide. Andıylar turında “Çitkä kittelär” digän äytem dä yäşi ide xalıq telendä. İnde zamanalar da, ildä xakimlek tä üzgärde. Yäşägän cirdä dä eş tabarğa mömkin kebek. Ämma äle dä “çitkä kitü” däwam itä. Elek ğailä belän küçep kitkän bulsalar, xäzer irlär yalğızları vaxta ısulı belän eşläp qaytalar. Eleke yıllardan ayırma bularaq, xäzer çit illärgä dä barıp eşli başladılar. Rusiälelär çit illärgä niçek kitälär, anda niçek yäşilär, nindi eşlärdä eşlilär, tuğan yaqların sağınalarmı, h.b. h.b? Bu sorawlarnı min Omskidan yıraq Portugaliä ilenä eşkä barıp qaytqan ber millättäşebezgä -İl'dar Mamatovqa yulladım.

Başta İl'dar äfände belän tanışıp ütik. Çit illärgä çığıp kitkänçe ul ölkäneñ zur bulmağan ber tatar awılı mäktäbendä direktor bulıp eşli ide. Ğailäse, 3 ulı bar. Ber köye genä yäşäp torğanda, yazmış anı çit illärgä alıp çığıp kitkän. Eş wäğdä itüçe firma belän aldan kileşü bulsa da, Mäskäwdä dä, çit ildä dä İl'dar äfändene kötep tormağannar.

Çit ildä dä aqçanı köräp birmägännär kilüçelärgä. İl'dar äfändegä dä, aqça tuplaw öçen, bar tapqanın saqlap totarğa turı kilgän. Qunaqxanä öçen tülärlek aqçası bulmağanda, maşina kabinalarında yoqlarğa, uramda uçaq yağıp, aş peşerergä turı kilgän aña. Eşne dä saylap tormağan, qayda quşsalar - şunda eşlägän.

İl'dar äfändeneñ borçılğan, qarañğı könnäre az bulmağan. İñ qıyını – sağınu xise ide di ul.

Şul yıllarda İl'dar äfändegä kilgän qara qayğı turında da äytep ütärgä kiräk. Portugaliädä çaqta 75 yäşendä änise wafat bula. Änisen cirlärgä qayta almawın bik awır kiçerä ul. Berniqädär waqıttan soñ ätise awırıy başlağaç, ber nindi çığımnarğa qaramıyça, ilenä qaytıp kilä.

Äye, çit ildä yäşäw, balda-mayda yözü tuğel. Ämma awırlıqlar küp oçrasa da, şatlıqlı könnäre dä bulğan İl'dar äfändeneñ. “Portugaliädä duslar taptım, keşelär bik yaxşı anda”, - di ul. Eş birgän xuca keşegä dä räxmätle buluı turında äytä.

Menä şulay, söyeneçläre- köyeneçläre belän 3 yılğa yaqın waqıt ütep kitä. Şunsı yaxşı, şul waqıt eçendä İl'dar Mamatov ölkä üzägennän 300 çaqrım yıraqlıqtağı Tara şähärendä 3 bülmäle fatir alırlıq aqça eşli alğan.

Şuşı urında İl'dar äfändeneñ macaralarına noqta quyarğa da mömkin bulır ide. Ämma tormış däwam itä. Aña äle ulların uqıtırğa, keşe itärgä kiräk. Mäktäptä eşläsäñ, uqıtuçı xezmät xaqı – aşaw-eçügä dä citmi. Tağın eş ezlärgä kiräk” ,-di ul. Xäzerge köndä aqçalı eş tä tapqan, tözeleştä eşli. Ämma ul waqıtlı eş. Çit ildä awırlıqlar kürsä dä, kiräk bulğan oçraqta, ul tağın da çit ilgä eşkä kitärgä äzer

Saniä Mirxaleewa. Omski.

XS
SM
MD
LG