Düşämbe könne Rusiäneñ tönyağında Uxta şähärendäge kibettä çıqqan yanğında hälak bulğannarnıñ sanı 24 buldı. 4 keşeneñ mäyete uzğan töndä tabılğan. Komi prokuraturasınıñ matbuğat wäkile Yuri Knyazev, jurnalistlarğa, yanğın ike yäşüsmerneñ kibet eçenä yana torğan sıyıqça atuları näticäsendä çıqtı, dip xäbär itte: "Tirä-yaq sintetik mäddädän bulğanğa diwarlarğa ut bik tiz qaptı. Terror ğämäle bulğanmı, yäşüsmerlärneñ ğadi xuliganlığımı – köndäşlär arasındağı suğışmı – säbäplären tikşeräbez." Tikşerüçelär süzlärenä qarağanda, faciğaneñ säbäbe – eşquarlar arasındağı qarşılıqlar, kibetkä ut törtü.
