Accessibility links

шимбә, 3 декабрь 2016, Казан вакыты 18:41

"Moscow Times": Putinneñ wäkalätlärne öleşçä kire töbäklärgä qaytara başlawı "beraz irekläşterelgän unitarizm" bulıp tora


Törle tantanalar, yuğarı däräcäle oçraşular häm bigräk tä Londondağı terror ğämälläre arqasında Rusiä Däwlät Şurasınıñ ay başında Kaliningradta uzğan utırışı niçekter iğtibardan çittä qaldı, xörmätle tıñlawçılar. Şul utırışta Rusiä prezidentı Vladimir Putin federal'' xakimiatneñ tizdän töbäklärgä yaña wäkalätlärne qaytaraçağın xäbär itkän ide. Çärşämbedä "Moscow Times" basmasında dönya kürgän mäqäläsendä Mäskäwdäge Carnegie Üzäge xezmätkäre Nikolay Petrov Putinneñ şuşı niäten ildä "irekländerelgän unitarizm" tözü dip atıy.

Rusiäneñ regional'' säyäsäten daimi küzätep barğan Petrov fikerençä, Däwlät Şurasınıñ Kaliningradtağı utırışında Putin aslıda berniçä yıl däwamında alıp barğan üzäkläşterü tırışlıqlarınıñ uñışsız buluın, alarnıñ iqtisadi, säyäsi häm sotsial'' ölkädäge üzgäreşlärgä turı kilmäwen tanıdı. Ämma berük waqıtta, Putinneñ qayber wäkalätlärne töbäklärgä kire qaytaru teläge älegä ğadi ber belderü genä bulıp qala. Alay ğına da tügel, 2-nçe yüldä uzğan utırış elekke federal'' tözeleşkä qaytunı hiç kenä dä añlatmıy, di Petrov üz mäqäläsendä, häm soñğı üzgäreşlärne - xakimiatne üzäk tarafınnan kontrol itelgän häm aña tuğrı bulğan cirle idarägä tapşırunı "beraz irekläşterelgän uniraizm"nıñ ber töre dip atıy. Däwlät Şurası utırışınıñ qayda häm qayçan buluın iskä alğanda, ä ul Putinneñ Kaliningradta Germaniä häm Fransiä citäkçeläre belän oçraşuı häm Şotlandiädäge "sigezlek" söyläşüläre aldınnan uzdı - Kreml'' üzeneñ şul üzgäreşläre Könbatışqa tieşle tä''sir yasar, anıñ antidemokratik, antifederalistik yözen yaxşırtır dip ömetlängän buluın kürsätä. Şuşı "yaña kurs", yäğni xäzer inde töbäklärgä wäkalätlärne öleşçä kire qaytara başlaw, şaqtıy çiklängän bulsa da, anıñ doşmannarı citärlek, di Petrov, häm alarnıñ berençe çiratta, üz wäkalätlären öleşçä töbäk citäkçelärenä birergä tieş bulaçaq federal'' ministrlar arasında buluına işarä itä. Şunı da istä totarğa kiräk, di ul - wäkalätlärne üzäktän töbäklärgä küçerü elekke xakimiat bizmänen torğızunı añlatmıy, çönki Mäskäw monı waqıtlı ğına eşläwen äytä häm alarnı ğämälgä quyunı qatği töstä küzätep baraçağın belderä. Töbäk citäkçeläreneñ Mäskäwdän bilgelänüe sürätendä "yaña regional'' kurs" barı tik sovet ölgesenä qarap qorılğan xäzerge unitarist qorılışnıñ azraq qına irekländerüen añlata. Kreml''neñ şuşı plannarı tulısınça tormışqa aşqan çaqta da, alar xäzerge faydasız, unitarist häm bürokratik sistemanıñ asılın üzgärtmäyäçäk, dip yaza Nikolay Petrov. Asılda şul sistemanıñ täräqqiatkä sälätle bulmawı inde kürende - üzäkläşterü säyäsäten başlawğa 13 ay da uzmadı, Mäskäw anıñ faydasızlığın tanıp, kire yünäleştä eş itä başladı, di "Moscow Times" basmasında dönya kürgän mäqäläsendä Rusiäneñ regional'' säyästen tikşerüçe Nikolay Petrov.

Kärim Kamal
XS
SM
MD
LG