Accessibility links

сишәмбе, 6 декабрь 2016, Казан вакыты 17:20

Britan politsiäse London şartlawlarınıñ artında toruçılarnı ezli


Britaniä politsiäse Londondağı şartlatularnı başqaruda şiklänelgän 4 keşeneñ kemnär buluın açıqlağannan soñ xäzer bu şarltawlar artında kem torğan digän sorawğa cawap ezli. Politsiä äytüençä, älege 4 şiklänelüçe uzğan pänceşämbedäge şartlawlar aldınnan London üzägendä, King''s Cross metro tuqtalışında oçraşqan. Kiñküläm mäğlümät çaraları alarnıñ kimendä 3-se Britaniädä tuıp üskän häm Angliäneñ tönyağında yäşäwçe paqstanlılar dip xäbär itte. Bu isä şartlatuçılarnıñ cittän kilmägänlegen, Britaniäneñ üzendä terrorçılıqnı yaqlawçı çeltär buluına kürsätä.

Kimendä 52 keşene ütergän, yözlärçä keşene yaralağan London şartlatuçıların ezläwçe Britan politsiäse şaqtıy yul ütep qayber sorawlarğa cawap taptı. Ämma alarnıñ bu tikşerü barışındağı härber cawabı yaña häm tağın da borçulıraq sorawlar uyata. Küzläw videokameralarınnan alınğan mäğlümätlär nigezendä tikşerüçelär Londonnıñ 4 urınındağı şartlawlar aldınnan King''s Cross stansiäsendä 4 keşeneñ oçraşuın açıqladı. Şartlaw bulğan urınnarda şul şiklelärneñ kimendä 3-seneke dip isäplängän tanıqlıq-dokumentlar da tabıldı. London metro politsiäseneñ terrorğa qarşı bülege xezmätkäre Peter Clarke sişämbe könne bu şartlawlarğa bäyle berençe qulğa alu oçrağın da iğlan itte.

AUDİO: Könbatış Yorkşayrda ber keşe qulğa alındı häm soraw alu öçen ul Londonğa kiterelä.

Bu keşe şartlatuçı dip şiklänelgännärneñ berseneñ tuğanı dip isäplänelä. Töp şiklelärneñ xäzer qayda buluı äle mäğlüm tügel. Politsiä alarnıñ berärse, yäki barısı da şul şartlawlarda ülgän bulırğa mömkin di.

Politsiäneñ töp açışı şul ki, şiklelärneñ küpçelege Britaniädä, Yorkşayrnıñ Leeds şähärendä tuıp üskän paqstanlılar dip isäplänelä. Ä berse Londonnıñ tönyağındağı Luton sänäğätçelek şähärennän dip uylanıla. Bu şähärlärneñ ikesendä dä şaqtıy küp möselman xalqı yäşi. Ägär bolar çınnan da döres bulıp çıqsa şaqtıy qurqınıçlı närsälär açıla. Yäğni Britaniä politsiäsenä ayırım ber terror ğämäle öçen çittän kilgän berniçä terrorçığa qarşı ğına köräşäse tügel. Britaniädä britan watandaşların Dönyanıñ iñ böyek şähärlärennän berse bulğan Londondağı iñ zur terror höcüme öçen yäşeren räweştä äzerlägän, öyrätkän häm şartlatqıçlar belän tä''min itkän cirle terrorçılar bar digän süz. Häm alar politsiäneñ häm küzläw xezmätläreneñ näq borın töbendä eş alıp bara.

Londondağı Strategik Tikşerenülär Xalıqara İnstitutınıñ iminlek mäs''äläläre analitigı Chris Langton.

AUDİO: Bu ilneñ iminlegenä zur orım buldı. Çönki beräw dä anıñ bulu mömkinlege turında uylamadı da. Çönki soñğı aylarda kiñküläm küzläw häm mäğlümätlär cıyu başqa küp oçraqlarda höcümnärne buldırmıy qalu öçen uñışlı yardäm itep kilde.

Analitiklar Britaniädä tulısınça cayğa salınğan terror çeltäre bar dip äytergä äle bik irtä dip isäpli. Şulay da qayberäwlär, şul isäptän Londondağı iminlek kiñäşçese Crispin Black hiçşiksez şarltatuçılarğa belgeçlär yardäm itkän häm alar çittän bulırğa da mömkin di.

AUDİO: Bu yäşlär üzlärennän üzläre intixarçığa äwerelgän häm Londondağı operatsiäne üz belemnäre belän başqarğan dip isäplämim. Minemçä alarğa bomba yasawçı texnik yaqtan yardäm itkän häm alar başqa keşeneñ quşuı häm citäkçelege belän başqarğan.

Älegä şul başqa keşeneñ kem buluı mäğlüm tügel. Politsiä xäzer şul keşegä iltüçe bäyläneşlärne ezli. Şiklänelüçelärneñ berse üz kürşesenä küptän tügel Äfğänstanda häm Paqstanda bulıp qaytuı turında söylägän bulğan. Şul uq waqıtta iminlek xezmätlärendäge qayber çığanaqlar London şartlawları, bıltırğı Madrid şartlawları kebek Tönyaq Afrika belän bäyle bulırğa da mömkin di.

Naif Aqmal, Praga.
XS
SM
MD
LG